"Lançohet në fund të prillit"/ Rama prezanton programin e ri në mbështetje të fermerëve

11 Prill 2026, 14:18, Politikë CNA

"Lançohet në fund të prillit"/ Rama prezanton

Kryeministri Edi Rama ka zhvilluar ditën e sotme një bashkëbisedim me fermerët në Krutje të Lushnjës.

Të pranishëm në takim janë dhe ministri i Financave, Petrit Malaj, ministri i Bujqësisë, Andis Salla, dhe drejtuesja politike e qarkut të Fierit, Belinda Balluku.

Gjatë fjalës së tij, Rama prezantoi një program që, sipas tij, do të lançohet në fund të muajit prill për mbështetjen e fermerëve. Programi, bashkëpunim mes qeverisë, Bankës së Shqipërisë dhe bankave të nivelit të dytë, do të funksionojë për fermerët që sjellin një plan për dyfishimin e biznesit të tyre.

“Duhet të biem dakord me ato që e shohin bujqësinë mundësinë për të jetuar, nuk është paraja çështja jonë kryesore. Çështja kryesore është çfarë duhet të bëjmë për ta siguruar paranë që na duhet për të ecur përpara në ndërmarrjen tonë. Vetëm duke u bashkuar secili fiton 30% më shumë.

Kur del në treg bashkë krijon masë, mundësi negocimi për çmimin dhe krijon qëndrueshmëri. Në të gjithë qasjen e financimit dhe mbështetjes do të stimulojmë ata që duan të rriten duke u bashkuar. Dje folëm për naftën. Është e neveritshme se si për hir të një lufte të verbër angazhohet një lukuni e tërë për të nxjerrë nga konteksti atë që themi. Jo të gjithë përfituesit ishin ata që e meritonin dhe përdornin naftën për punë bujqësie. Skema e ndarjes për pronësinë e tokës ishte një skemë që kishte problematikën e vet. Ata që flasin janë të verbër dhe të lig. Ju intereson të nxisin agresivitet ndaj qeverisë.

Ne po komunikojmë me ju dhe përmes kamerave t'jua komunikojmë gjithë fermerëve ofertën e re për bujqësinë. Oferta e re do të thotë jo vetem 52 milionë euro për skemat mbështetëse, jo vetëm rimbursimin, jo vetëm programin e ri me BE-në, por edhe programin të cilin do ta lançojmë në fund të muajit prill së bashku me Bankën e Shqipërisë dhe bankat e tjera të nivelit të dytë.

U thotë sipërmarrësve do të dyfishosh biznesin, sill planin, qeveria do të mbështesë dhe bankat do të japin deri në 2 milionë euro. Ne kemi studiuar se si funksionon dhe kemi konstatuar faktin se në Shqipëri ka në realitet prodhuese të vogla që mund të bëhen të mëdha. Dje ishim në Berat me prodhuesit e vajit të ullirit që ishin bashkuar bashkë. Kishin bashkuar procesin e grumbullimit, ambalazhimit, marketimin dhe shitjes. Kishin krijuar një masë për shitjen në treg”, u shpreh Rama. /CNA