3100 persona në paraburgim/ Manjani: Kulmi i dështimit, dhunë shtetërore

28 Dhjetor 2023, 19:56, Politikë CNA

3100 persona në paraburgim/ Manjani: Kulmi i dështimit, dhunë

Ish-ministri i Drejtësisë, Ylli Manjani

Ish-ministri i Drejtësisë, Ylli Manjani ka reaguar për numrin e personave të burgosur në Shqipëri, duke marrë shkas nga bilanci i publikuar së fundmi në media.

Manjani deklaron se në total janë izoluar 5200 persona, nga të cilët 3100 të paraburgosur. Me anë të një statusi në rrjetet sociale, ai thotë se nuk ka qenë kaq i lartë numri i të paraburgosurve sa tani.

Sipas tij, kjo shifër tregon dhunë shtetërore dhe kulmin e dështimit të ndjekjes penale në Shqipëri dhe hakmarrje primitive në emër të forcës.

Statusi i plotë:

Burg-burg-burg, bëhet dhunë shtetërore.

Nga rreth 5200 të izoluar në institucionet e vuajtjes së dënimit, pra ku gjendet të izoluar të dënuar dhe të paraburgosur, 3100 prej tyre janë të paraburgosur. Vetëm 2100 të izoluar janë të dënuar me vendim të formës së prerë. E dhënë kjo e bërë publike nga një raportim i BIRN.

Pra 60 % e të izoluarve në burgje janë pa një vendim dënimi nga gjykata!!! Kurrë më parë nuk ka qenë kaq i lartë numri i të paraburgosurve sa tani.

Ky është kulmi i dështimit të ndjekjes penale në Shqipëri. Praktikisht arresti me burg është bërë vendim dënimi. Një dënim pa prova dhe pa proces të rregullt.

Një ndjekje penale që bazohet në sentencën politike "burg-burg-burg" nuk është drejtësi, por dhunë shtetërore. Hakmarrje primitive në emër të forcës. Kjo dhunë dukshëm është e motivuar politikisht. Drejtësia e reformuar zbaton sentencën e diktuar publikisht nga Edi Rama "burg-burg-burg".

Kjo dhunë e shprehur në këto statistika është abuzim masiv me liritë kushtetuese dhe ligjet e ndjekjes penale. Burgjet janë konceptuar për të dënuarit për krime dhe jo për të dënuar njerëz pa prova. Paraburgimi është konceptuar për raste ekstreme, kur mjetet e tjera nuk kanë dhënë rezultat.

Terror shtetëror për të krijuar idenë fallco të shtetit, janë këto të dhëna.

Kjo situatë do të thotë pasiguri masive ligjore për shtetasit në këtë vende. Kombinuar edhe kontrollet e dhunshme të banesave, bisneseve, personave, përfshi këtu edhe median, kjo statistikë përforcon klimën shtypëse të pushtetit në emër të reformës në drejtësi.

Kush ka sy në ballë e mend në kokë e lexon dhe e mendon këtë gjë si represion ekstrem të shtetit kundër shtetasve të vet./ CNA