“Tërmet Peçi i dhuron motrës së tij tokë publike, Krifca ka dhënë 1 milion euro nga fondet e fermerëve”/ Denoncimi i PD-së

30 Prill 2025, 13:34, Politikë CNA

“Tërmet Peçi i dhuron motrës së tij tokë

Anëtari i kryesisë së PD-së, Arben Ristani, në një deklaratë për mediat, është ndalur te denoncimi i emisionit “Plug” se Tërmet Peçi ka dhënë tenderë 66 milionë euro në periudhën kur ishte kryebashkiak në Tepelenë.

Në deklaratën e tij, Ristani tha se Tërmeti nuk mund të ishte ndryshe nga shokët e tij, dhe i ka dhënë tender për ndërtimin e një agroturizmi motrës së tij.

Mbështetje për këtë, deklaroi Ristani, është marrë edhe nga ministrja Krifca, e cila i ka dhënë nga fondet e fermerëve.

“Emisioni investigativ 'PLUG', denoncoi një skemë tjetër korruptive në një ndër qarqet më të varfra të Shqipërisë, në Bashkinë e Tepelenës.

Tërmet PUBLIÇITARI dhe drejtori i tij kamikaz Lorenc Bami, kanë krijuar një skemë të mirëfilltë korruptive për të përfituar 18 milionë euro të ardhura nga paratë e taksapaguesve shqiptarë.

Konkretisht në vitin 2017 Lorenc Bami, nëpërmjet gruas së tij, themelon kompaninë 'NG STRUCTURES' dhe menjëherë firmosën tenderë publikë në Bashkinë Tepelenë dhe Gjirokastër.

Kjo kompani, e vetme dhe në bashkëpunim me operatorë të tjerë, ka rezultuar fituese në tenderë me vlerë 66 milionë euro, ku spikasin tenderët e rindërtimit.

'NG STRUCTURES' rezulton që të jetë kompania e përzgjedhur dhe nga 'IUMENTIS' sh.p.k., kjo e fundit me firmën e Tërmet Publiçitarit ka përfituar tokë publike dhe leje ndërtimi për thertoren rajonale të Qarkut Gjirokastër, e më pas kalon paratë te kompania e drejtorit të bashkisë.

Por abuzimi nuk mbaron me kaq, Lorenc Bami në vitin 2019 themelon dhe një tjetër kompani, 'Artreum Generation' nëpërmjet së cilës ka marrë nënkontraktimin e një tjetër tenderi në Bashkinë Memaliaj për ndërtimin e Ujësjellësit, një tjetër procedurë e denoncuar nga Partia Demokratike.

Të nderuar qytetarë,

Tërmeti i partisë nuk mund të ishte ndryshe nga shokët e Rilindjes.

Me VKB të posaçme, ai i ka dhuruar motrës së tij mijëra metra katrorë tokë publike në fshatin Rexhin për ndërtimin e një Agroturizmi dhe, për financimin sigurisht i vjen në ndihmë shoqja tjetër rilindase, Frida Krifca, me një financim në vlerën 220.000 euro me fondet e IPARD.

Për thertoren dhe Agroturizmin e motrës, Frida Krifca ka dhënë rreth 1 milion euro nga fondet, të cilat duhet të shkonin për fermerët.

Kjo pra është thertorja korruptive në të cilën Tërmeti i partisë i futi paratë e qytetarëve të Gjirokastrës, Tepelenës dhe Memaliajt.

Kjo kasaphanë korruptive me paratë e shqiptarëve do të marrë fund më 11 maj.

Sot në emër të Partisë Demokratike depozitova pranë SPAK-ut kallëzimin penal për këtë megavjedhje 5T, e cila ka lënë me gojë hapur edhe arkitektët e '5D'-së.

Partia Demokratike zotohet se do t’i çojë para ligjit të gjithë ata që kanë futur duart në xhepat e qytetarëve shqiptarë, si dhe do të konfiskojë çdo pasuri të vënë në kurriz të shqiptarëve, për t’i kthyer ato para në buxhetin e shtetit", tha Ristani./ CNA