E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Shqipëria 2030 dhe qeverisja që vjen nga restoranti

9 Shtator 2025, 14:23, Opinione Afrim Krasniqi

Gjatë vitit 2025 pati zgjedhje në disa vende europiane dhe pas tyre edhe krijim të qeverive të reja dhe nisje të legjislaturave parlamentare.

Në Berlin, Lisbonë apo Otava kryeministri fitues konsultoi dhe hartoi programin qeverisës, përcaktoi prioritetet dhe buxhetet, prezantoi në publik politikat prioritare dhe pas dakordësisë, nënshkroi kontratë me partnerët në qeveri.

Pas këtij procesi u kalua te krijimi i kabinetit qeveritar dhe ekipit drejtues parlamentar, të cilët gjithashtu ishin rezultat votëbesimi dhe përzgjedhje e bazuar në cilësinë, mandatin dhe aftësinë e tyre për përmbushjen e programit qeveritar. Ky është standardi dhe rregulli klasik në një vend demokratik.

Po në Shqipëri? Partia Socialiste ka lajmëruar mbledhje të radhës me 11 shtator në një restorant në periferi të Tiranës. Si edhe në të kaluarën, aty kryeministri do të mbajë fjalim politik dhe në fund të tij, do të bëjë publik emrat e ministrave të rinj dhe ekipit të ri drejtues në parlament dhe në qeveri. Asnjëherë, askush, as ata që ikin apo vijnë, nuk janë në dijeni paraprake mbi vendimin e kryeministrit. Në këtë mënyrë ata do të jenë ministrat e vetëm në shtetet demokratike që e mësojnë në TV live nëse janë shkarkuar, nëse rikonfirmohen ose nëse zgjidhen (për herë të parë). E njëjta edhe me kryesinë e Kuvendit apo postet politike në parti.

Në fund të mbledhjes media do të merret me emrat, 'surprizat', qeveria do të kalojë formalisht për debat e votim në Kuvend, Kuvendi do votojë formalisht drejtuesin e vet dhe kështu, brenda pak ditësh do të kemi në detyrë parlamentin e ri, qeverinë e re dhe ekipin e ri drejtues të mazhorancës, së paku, për dy vitet e ardhshme.

Në mes të mandatit gjithnjë ka pasur dhe do ketë ndryshime, kryesisht nisur nga nevoja elektorale. Ajo që do t‘i mungojë medias dhe publikut është pjesa më e rëndësishme, – programi, prioritetet, kontrata shoqërore votues – mazhorancë, vizioni strategjik, buxheti dhe mekanizmat që garantojnë një zhvillim cilësor për vendin e qytetarët.

Për ato nuk u gjet kohë për debat gjatë 4-5 muajve të fundit, nuk ka vend as në mbledhjen formale në restorant ku do të emërohet qeveria dhe kryesia e re e parlamentit.