E fundit!

10:38 Kulturë

Ndahet nga jeta mjeshtri i humorit, Todi Llupi

Ndahet nga jeta në moshën 78-vjeçare mjeshtri i humorit, T...

Pse nuk duhet mbyllur “TikTok”-u?

20 Nëntor 2024, 16:27, Opinione Lutfi Dervishi

Kur makina shtypi njeriun e parë, kori i atyre që donin të ndalonin makinën nga qarkullimi nuk ishte i vogël.

Si mund të vdesë njeriu nga makina?!! Skandal? Çfarë është kjo monstër që vret njerëz? Me kuajt ishim rehat.

Makinat nuk u ndaluan, por u investua shumë në infrastrukturë, në sinjalistikë, në rregullore, në masat e sigurisë. Makina vazhdon të marrë jetë njerëzish edhe sot, por askujt nuk i shkon në mendje të nxjerrë makinën nga rruga.

Debati i hapur sot nga kryeministri për të mbyllur “TikTok”-un dhe “Snapchat”-in për shkak se nxisin bullizmin, gjuhën e urrejtjes, ka vlerë vetëm nëse nxirren mësime nga pësimet dhe nuk shkojmë në zgjidhje alla Adhamudh.

Sot teknologjia nuk është thjesht një mjet; është një pjesë integrale e jetës sonë. Nuk divorcohemi dot nga jeta digjitale. “TikTok”-u, “Snapchat”-i dhe platformat e tjera sociale nuk janë burimi i problemit – ato janë mjete, ashtu si makina, që përdornim dje dhe që përdorim edhe sot.

Vrasja e 14-vjeçarit/ Rama merr masa: Do të diskutojmë mbylljen e "TikTok"-ut
20 Nëntor, 12:52

Problemi nuk qëndron te “TikTok”-u dhe platformat e tjera, por te mënyra si ne i përdorim dhe si i menaxhojmë efektet e tyre në shoqëri.

Nëse mbyllim “TikTok”-un dhe “Snapchat”-in, a jemi të sigurtë se në platforma të tjera nuk ka bullizëm, gjuhë urrejtjeje, veprime të paligjshme?!

Në vend që të mbyllim këto platforma, duhet të investojmë në “infrastrukturën” sociale.

Në anarkinë e botës digjitale që po jetojmë zgjidhja duhet kërkuar tek edukimi dhe jo ndalimi.

Një përdorues i mirinformuar fiton dhe nuk humbet nga rrjetet sociale.

Në vend që t’i shmangemi teknologjisë, duhet të edukojmë fëmijët dhe të rinjtë se si ta përdorin në dobi të tyre atë.

Pse nuk duhet mbyllur “TikTok”-u?

Kurrikulat shkollore duhet të kenë lëndë mbi etikën e përdorimit të mediave sociale dhe njohuri mbi privatësinë, bullizmin digjital dhe ndikimin emocional që nesër mund të vijë jo vetëm nga përdoruesit njerëzit, por edhe nga botët dhe Inteligjenca Artificiale.

Ashtu si sinjalistika rrugore rregulloi trafikun, ligjet duhet të rregullojnë përdorimin e teknologjisë.

Mund të vendosen kufizime për algoritmet që promovojnë përmbajtje të dëmshme ose të përcaktohen mekanizma më të fortë për raportimin e bullizmit dhe gjuhës së urrejtjes.

Mund të investohet më shumë për të luftuar krimin kibernetik për t’ia ngulur në mendje “trimit” dhe “anonimit” se në rrjet “nuk është aq i padukshëm dhe i pakapshëm sa mendon”.

Ashtu si fëmijët nuk lejohen të ngasin makinën pa një licencë, edhe qasja e tyre në teknologji mund dhe duhet të jetë e mbikëqyrur. Prindërit dhe mësuesit kanë një rol për të luajtur në mësimin e vetëkontrollit dhe përdorimit të vlefshëm dhe etik të teknologjisë. Ashtu si makinat kanë evoluuar me rripa sigurie, “airbag” dhe sensorë që shmangin aksidentet, edhe platformat digjitale mund të zhvillojnë teknologji që minimizojnë rreziqet.

Pse nuk duhet mbyllur “TikTok”-u?

Algoritmet duhet të programohen për të favorizuar përmbajtje pozitive, ndërsa përdoruesit duhet të kenë informacionin e duhur se si të dalin nga një mjedis toksik online.

Në vend që të demonizojmë dhe të mbyllim një platformë, le të hapim debatin mbi efektet që ka teknologjia mënyrat më të mira për ta përdorur atë. Të mbyllim hapësirën virtuale apo të flasim për një mjedis digjital të shëndetshëm?

Mbyllja nuk është zgjidhje!

Ashtu si nuk ndaluam makinat, nuk mund të ndalojmë rrjedhën e teknologjisë. Aq më tepër që me Inteligjencën Artificiale nuk jemi para një rrjedhe, por një dallge të madhe.

Çdo përpjekje për të mbyllur platformat digjitale është një luftë kundër erërave të kohës. Nëse te mbyllja kërkojmë zgjidhjen kemi injoruar rrënjët e problemit.

Në fund të fundit, platforma si “TikTok” nuk janë “monstra” që duhet të eliminohen, por “makina të reja” që kërkojnë rregullore, edukim dhe përgjegjësi.

Në vend që të bëjmë luftë me teknologjinë, le të investojmë të mësojmë si të bashkëjetojmë me të.

Nëse duhet të shpallim luftë, para se të çarmatosim duart, duhet të çarmatosim mendjen, zemrën dhe gjuhën. A e bëjmë dot këtë?