Nga Grigels Muçollari/ Duhet përmbysje!

20 Nëntor 2024, 12:11, Opinione CNA

Grigels Muçollari

Te dera e shkollës "Fan Noli", ku Martini 14 vjeç mori dje goditjen fatale, humbi pak jetë, ndërgjegje dhe shpirt i gjithë qyteti, të gjithë ne.

Nuk ka nevojë ta kesh të njohur apo të afërt Martinin për të qenë i lidhur me këtë tragjedi. Kur një i mitur vritet sapo ka dalë nga klasa, me çantën me libra në krahë, në mes të ditës, në mes të qytetit, ai është pjesë e jona, i përket kësaj drame që luan aktet njëra pas tjetres, para syve tanë, mes nesh.

Jemi pak a shumë të gjithë përgjegjës sepse theqafja e këtyre brezave po ndodh para hundës sonë dhe pjesa me e madhe po e përcjellim me indiferentizëm, me idenë se nuk është te pragu im.

Një naivitet revoltues. Kur vrasja ndodh te dera e shkollës, ka ndodhur te pragu i secilit prej nesh.

Po më së pari, përgjegjësia është e autoriteteve. Ai oficeri i policisë që u mburreshin ministrat se do të ishte te dera e shkollës, mungoi. Ambulanca vonoi.

I plotfuqishmi i zonës që ka informacion, e që si rregull e di se ato grupime kanë kohë që përplasen, dështoi.

S'ka pengesa për të mbajtur armë të ftohta, apo për ekspozimin para substancave të ndaluara.

Këto janë ato mungesat tona të mëdha që i rrit edhe më shumë qeveria duke mohuar, duke propaganduar sikur ekzistojnë e janë në rregull gjithë këto instanca.

Ne të gjithë kemi përgjegjësi pasi i kemi lënë këta të rinj, të militojnë në një botë të egër online, në platforma që promovojnë krime e dhunë.

Duke menduar se janë me telefon në dorë dhe janë rehat.

Është urgjente që të kemi mbikëqyrje në sferën ku po qëndrojnë me orë të tëra çdo ditë 14-vjeçarët, aty ku marrin modelet e mbrapshta, aty ku agresohen, ku manipulohen.

Kjo është një betejë, një sfidë e vështirë për gjithë botën, për prindërit kudo. Ama në Perëndim, po hidhen hapa, po merren masa për ta kufizuar qëndrimin e fëmijëve në atë hapësirë, ose për ta monitoruar.

Vetëm këtu te ne, s'ka ide, s'ka masa, propozime për të bërë rregullime. Dhe për më keq, kemi dhe një ministre Arsimi që pasi ka ndodhur kjo dramë në oborrin e një shkolle, ka arrogancën të dalë në foltoren e Parlamentit e të mos pranojë asnjë përgjegjësi e ka kurajën të fajësojë të tjerët.

Çdo gjë mbrapsht. Ky vend s'ka thjesht nevojë për ndryshim. Ka nevojë për përmbysje./ CNA