Një reagim që i thotë të gjitha

1 Maj 2024, 12:03, Opinione Grigels Muçollari

Pasi qendroi 7 orë me kolegët e tij në SPAK, përkundër asaj që deklaroi në dalje para kamerave, se kishte kaluar një ditë të kendshme, Erjon Veliaj pasdite vonë tregoi se nuk ishte aspak rehat.

Në përgjithësi në deklarimet publike ai pjesën më të madhe të kohës ua dedikon kundërshtarëve dhe kritikëve, me vrer e me fjalor të padenjë.

Por pas daljes nga SPAK-u, Veliaj pati një shfrim skandaloz, të pashembull, ndaj demokratëve dhe disa analistëve. Këtij zyrtari që ka në kurriz dy prej aferave më të rënda korruptive të kohëve moderne, i duket normale që pjesa më e madhe e mediave heshtin, nuk përcjellin asgjë kundër tij, e mbulojnë "live" sa herë bën një asgjë, dhe i duket shqetësuese që një grusht mediash, dhe opinionistësh, e kritikojnë dhe e akuzojnë.

Erion Veliaj është një kontribuues i vazhdueshëm i ndotjes etike në sferën publike me aciditet, armiqësi, dhe me etiketime vulgare, me shpifje e damkosje ndaj tjetrit, me linçime publike, (kujtojme këtu se ai është korrieri i paturp në anglisht i rastit Griselda) aq sa zuri një vend nderi edhe në raportin e fundit të Departamentit të Shtetit, për kërcënimet ndaj gazetares Xama.

Por ajo që bëri të martën në darkë kalon çdo limit, çdo normë humane. Dhe është nga ana tjetër një autogol i madh për atë vetë.

Përflet, e përgojon analistët e kundërshtarët, dhe u nxjerr në publik çdo gjë nga e shkuara. Ai del se merr informacion për ata që nuk i pelqejnë, deri në detaje të imëta. U futet edhe në shtëpi. Kundron dhe se çfarë bejnë natën vonë.

Pra Veliaj është një njeri i mirëinformuar për këdo. Ama vetëm për drejtorët e tij, të cilët, me mbi 30 procedura, me mbi 30 transaksione, i kaluan vetes së tyre mbi 30 milione euro të bashkisë, vetëm këtë ai nuk e ka ditur. Ta do mendja se një njeri që i lë njerëzit, bashkëpunëtorët kaq të lirë e nuk ushtron shtrëngim se ç'bëjnë ata, do të jetë më anë tjetër një galantom që nuk gërmon në jetën e askujt.

Po ja pra që nuk qenka aspak kështu. Nëse Veliaj di çdo gjë, çfarë bën Batoni, ai patjetër di çdo gjë çfarë bëri Taulanti, Redi, Ermali, Marigleni, e soji i tyre.

Duke fyer e nëpërkëmbur emra e njerëz, në darkën post-SPAK, Veliaj ka lexuar padashje prerencën ndaj vetes.
Ai nuk është i pafajshëm dhe nuk e kanë mbajtur larg e në errësirë, vartësit e tij. Ai di gjithçka. Dhe është përgjegjës 100 për qind për "5D" e çdo zullum tjetër me taksat e qytetarëve të Tiranës./CNA