E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Kujdes nga çakejtë e politikës që sot përdorin fjalën e Musine Kokalarit

14 Gusht 2022, 08:17, Opinione Xhafer Rakipllari

Kujdes nga çakejtë e politikës që sot përdorin

Studentëve, ish-studentëve të mi (sot kolegë), në përvjetorin e vdekjes së Musine Kokalarit:

Njiheni Musinenë dhe veprën e saj! Duajeni Shqipërinë edhe në kohë të liga si Musineja! Kujdes nga çakejtë e politikës që sot përdorin fjalën e Musinesë, por veprën ndaj atdheut e kanë si persekutorët e saj!

Musine Kokalari lindi më 10 shkurt të vitit 1917. Në vitet '30-'37 u shkollua në Tiranë, fillimisht në Institutin “Qiriazi” e më pas në Institutin “Nëna Mbretëreshë".

Më '38-n, Musineja nisi studimet në Fakultetin e Letërsisë Moderne në Universitetin “La Sapienza”, ku pas mbarimit ('41) u përfshi në lëvizjet antifashite në Romë e me të njëjtat bindje kthehet në Shqipëri. Me një vizion tashmë të zgjeruar e të pasuruar, në vitin '43 ajo bëhet frymëzuese dhe themeluese e Partisë Social Demokrate të Shqipërisë.

Kjo periudhë e frytshme në rrafshin intelektual për Musinenë, do të përkonte me një kohë tragjike në rrafshin njerëzor e shoqëror për të e Shqipërinë. Më 12 nëntor '44 forcat komuniste ekzekutojnë dy vëllezërit e saj Vesim dhe Muntaz Kokalari, ndërsa ajo vetë do të arrestohej dy herë gjatë nëntorit '45.

Kujdes nga çakejtë e politikës që sot përdorin

Më 23 janar të vitit '46 Musineja arrestohet dhe u nënshtrohet torturave të vazhdueshme në qeli, por refuzon të heqë dorë nga bindjet e saj për një sistem pluralist dhe shoqëri të lirë, siç kërkohej në “Koalicionin Demokratik” (lëvizje intelektuale që bënte tok grupimet opozitare para zgjedhjeve të dhjetorit '45).

Më 2 qershor '46, Musine Kokalari gjykohet në një proces të turpshëm. Pavarësisht kërcënimeve dhe trajtimeve çnjerëzore, ajo shfaq guxim duke ripërsëritur qëndrimet e saj përgjatë kohës shumë të shkurtër kur pati mundësinë të fliste (foto 1). Rezistenca stoike e Musinesë gjatë procesit gjendet e ilustruar në një foto të shkrepur nga Agjencia Telegrafike Shqiptare (foto 2).

Musineja u dënua me 25 vjet burgim (nga të cilat 16 vite i kaloi në burg) si dhe me persekutim të përjetshëm. Gjatë kohës së burgut, iu nënshtrua torturave të tmerrshme të regjimit. Në vitin '72, Musineja arrin të përfundojë në fshehtësi librin “Si lindi Partia Social Demokrate”, ku shpjegon pikëpamjet e saj antikomuniste dhe alternativën e saj progresiste e demokratike. Arriti ta ruante këtë vepër përmes një serie shkrimesh që ia dërgoi nipit të saj, Platon Kokalari, nën tematikën “Të shpëtojmë sa të mundim nga vlerat morale”.

Musineja ia dorëzoi shpirtin Krijuesit në 13 gusht të vitit 1983, 3 vjet pasi u diagnostikua me kancer dhe ashtu e sëmurë u refuzua e u la pa u kuruar nga trupat spitalore.

Musine Kokalari përfaqëson disidenten e parë shqiptare./CNA.al