E fundit!

22:46 Aktualitet

Pas ndeshjes, protestuesit zhvendosen te selia e PD-së: Opozitë e shitur

Pas ndeshjes, protestuesit janë zhvendosur para selisë së ...

Demokracia, shpjeguar me tri batuta

8 Gusht 2024, 10:40, Opinione Ardi Stefa

Tri kafe piva dje me tre persona të ndryshëm.

Natyrisht, biseda u soll rreth asaj çka i shqetëson më shumë shqiptarët: Demokracisë! Duke e ditur angazhimin tim në vitet ’90, i pari më tha: “Nga ju e kemi këtë gjendje! Ju na sollët në këtë derexhe me idealizmin tuaj. Apo e kam gabim?

“Ke të drejtë,- iu përgjigja- kemi faj. Por sot i ngjajmë atij të pandehurit në sallën e gjyqit, i cili pasi kishte vrarë prindërit u kërkonte mëshirë gjykatësve, sepse ishte jetim!”. Më pa me vështrimin mbi syzet personi, me të cilin pija kafenë, nuk foli, miratoi në heshtje dhe iku. Kafenë e pagova unë.

Kafenë e dytë e piva një orë më pas me një mesoburrë, i cili, ngaqë është nga një zonë e Vlorës, që shquhet për ironi, e mban veten për sarkastik. Përsëri i njëjti diskutim, përsëri e njëjta akuzë. Edhe atij i dhashë të drejtë. “Ngjajmë me atë bashkëshortin e tradhtuar nga gruaja, që për të dënuar gruan preu veglën e vet!” Duket nuk i pëlqeu çështja e tradhtisë dhe e veglës, pasi iku edhe ky pa paguar, madje pa e mbaruar as kafenë.

Pasdite u ula për qejfin tim në një kafe buzë detit, në Lungomare. Erdhi dhe m’u ul në tryezë për qejfin e tij një ish-funksionar shumë i lartë në Vlorë. Folëm për plot gjëra, derisa biseda erdhi përsëri te demokracia jonë e brishtë.

“Demokracia jonë,- i thashë.- më ngjan me atë historinë me hoxhë efendiun, rabinin dhe priftin. Si?- më pyeti me habi.
- Po ja,- iu përgjigja. Pyetën njëherë hoxhën besimtarët se ku shkonin paratë që ata jepnin për xhaminë. Dhe hoxhë efendiu bëri një vizë në shesh dhe tha: “Do t’i hedh lekët lart. Ato që do bien majtas janë të miat. Çfarë do bien djathtas janë të xhamisë. Dhe i hodhi lekët, natyrisht me tendencën majtas.

E njëjta gjë me rabinin. Rabini bëri një rreth të vogël në shesh dhe tha: “Do i hedh lekët lart. Çfarë do bien në rreth janë të Zotit, ato që do bien jashtë rrethit janë të miat...

E njëjta pyetje iu bë priftit. (E lashë të fundit shembullin me hirësinë e tij, ngaqë jam vetë ortodoks dhe e rëndova pak më tepër për të mos fyer ndjenjat fetare të të tjerëve.) Dhe prifti i mori lekët e arkës dhe i hodhi në ajër. Pastaj u ul dhe i mblodhi të gjitha. “Unë ia dhashë të gjitha Zotit kur i hodha lart. Ai po të donte i mbante të gjitha.”- tha dhe iku me paratë në xhepat e thellë të rasos.

Kështu edhe demokracia jonë. Aspak demokraci. Gjysmë demokraci. Gjasme demokraci. I shkon ajo shprehja e atij kirurgut, i cili u tha familjarëve të pacientit: "Operacioni doli me sukses! Pacienti vdiq!"

Politikanët tanë u ngjajnë hirësive të tyre. Vetëm për demokracinë dhe popullin nuk mendojnë, veç për vetveten. Dhe për këtë e kemi edhe ne fajin që i durojmë 34 vite; që i ndjekim me karrige në krah lart e poshtë mëpër sheshe; që u mblidhemi poshtë ballkoneve, sepse mendojmë se do shërojmë herniet cervikale duke ngritur kokën lart në pritje të ndonjë kocke; apo u bëjmë “like” postimeve të Likes majë strukturave metalike të reklamave, maleve apo lumenjve ku zhytet për t’u stërvitur për të përballuar hallet e popullit...

p.s: Shyqyr që e mbylla ditën me tri kafe, sepse batuta e katërt do të ishte më e hidhur dhe aspak metaforike.../CNA