E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Ja, pse femrat e ndjejnë të ftohtin më shumë sesa meshkujt

10 Qershor 2022, 14:39, Lifestyle CNA

Nga Charlotte Phelps & Kristian Moro “The Conversation”

Ne të gjithë kemi preferenca të ndryshme, se kur është koha e duhur për të nxjerrë nga dollapi rrobat e dimrit. Dhe temperatura e ambientit është shpesh objekt debati në zyra midis grave dhe burrave. Midis gjinive ka gjithmonë më shumë ngjashmëri sesa dallime.

Por studimet tregojnë vazhdimisht, se gratë preferojnë një temperaturë më të lartë ne ambientet e brendshme sesa burrat. Por a ka ndonjë fakt shkencor që mbështet besimin e përhapur, se gratë “e ndjejnë të ftohtin” më shumë se sa burrat?

Dallimet biologjike midis burrave dhe grave

Me afro të njëjtën peshë trupore, gratë priren të kenë më pak muskuj për të gjeneruar nxehtësi. Po ashtu ato kanë më shumë yndyrë midis lëkurës dhe muskujve, ndaj lëkura e tyre duket më e ftohtë, pasi është pak më larg enëve të gjakut.

Gjithashtu, gratë priren të kenë një normë metabolike më të ulët se burrat, gjë që redukton kapacitetin e prodhimit të nxehtësisë gjatë ekspozimit në temperatura të ulëta, duke i bërë ato më të prirura për të ndjerë ftohtë kur bie temperatura.

Dallimet hormonale

Hormonet esrogjen dhe progesteron, që gjenden në sasi të mëdha tek gratë, kontribuojnë në temperaturën e trupit dhe lëkurës. Estrogjeni i zgjeron në ekstremitete enët e gjakut. Kjo do të thotë se humbet më shumë nxehtësi nga trupi.

Ndërkohë progesteroni mund të shkaktojë ngushtimin e enëve të lëkurës, gjë që do të thotë se më pak gjak do të rrjedhë në disa zona, për t’i mbajtur më të ngrohta organet e brendshme, duke i bërë gratë të ndjehen më rehat. Ky ekuilibër hormonal, ndryshon gjatë muajit krahas ciklit menstrual.

Po ashtu hormonet bëjnë që duart, këmbët dhe veshët e grave të qëndrojnë rreth 3 gradë Celsius më të ftohta se ato të burrave. Temperatura kryesore e trupit, është më e lartë në javën pas ovulacionit, pasi rriten nivelet e progesteronit.

Kjo do të thotë se rreth kësaj kohe, gratë mund të jenë veçanërisht të ndjeshme ndaj temperaturave më të ftohta në ambientet e jashtme. Megjithëse duart dhe këmbët janë më të ftohta, trupat e femrave kanë temperatura mesatare më të ngrohta se burrat. Ky ka të ngjarë të jetë edhe burimi i thënies “duar të ftohta, zemër e ngrohtë”.

A është kjo diferencë vetëm tek njerëzit?

Dukuria që disa prej nesh preferojnë temperaturat më të ngrohta se të tjerët, nuk është unike për njerëzit. Studimet mbi shumë lloje zogjsh dhe gjitarësh, raportojnë se meshkujt mblidhen zakonisht në zonat më të ftohta ku ka hije, ndërsa femrat dhe të vegjlit e tyre qëndrojnë në mjedise më të ngrohta ku bien rrezet e diellit.

Lakuriqët e natës meshkuj, preferojnë të pushojnë në majat e ftohta dhe të larta të maleve, ndërsa femrat qëndrojnë poshtë në lugina që janë më të ngrohta. Gjitarët femra mund të kenë zhvilluar një preferencë për klimat më të ngrohta, për t’i inkurajuar ato të pushojnë me pasardhësit gjatë fazave kur të vegjlit nuk janë në gjendje të rregullojnë temperaturën e trupit të tyre. Pra, ndryshimi midis mekanizmave të ndjeshmërisë së nxehtësisë, mund të garantojë një avantazh evolucionar .

Si të biem dakord mbi temperaturën ideale?

“Metoda skandinave e gjumit”, ku çiftet flenë me batanije të veçanta, është një mënyrë për të kapërcyer dallimet në preferencat ndaj temperaturës. Në vendin e punës, sistemet e rehatisë personale janë sisteme termike që ngrohin ose ftohin, dhe që mund të vendosen në nivel lokal në vendet individuale të punës, si në tavolinë, karrige apo pranë këmbëve.

Shembujt përfshijnë ngrohësit e vegjël të tavolinës, apo batanijet me ngrohje. Këto sisteme ofrojnë rehati termike të individualizuar, për të përmbushur nevojat personale, pa ndikuar

tek të tjerët që ndodhen në të njëjtën hapësirë. Po ashtu, ato mund të jenë një metodë për përdorimin efikas të energjisë elektrike duke balancuar komoditetin termik dhe shëndetin e punonjësve në ambientet e punës.

Përkthyer dhe përshtatur nga CNA.al