web counter
LEXO PA REKLAMA!

SHKARKO APP

App Store
Google Play

E fundit!

x

Rrëfehet Albano Carrisi/ Udhëtimet në kohën e regjimit komunist dhe koncerti në Tiranë

7 Qershor 2022, 20:09, Lifestyle CNA
Rrëfehet Albano Carrisi/ Udhëtimet në kohën e regjimit
Këngëtari Albano Carrisi

Artisti i njohur italian Albano Carrisi, i cili ndodhet në Tiranë për të mbajtur një koncert, ka rrëfyer për rastet kur ka ardhur në Shqipëri, në kohën e regjimit komunist.

Carrisi tha se në 1985-ën babai kishte kaluar një infarkt dhe i kishte kërkuar të vinte në Shqipëri para se të ndërronte jetë. Ai tregoi se për të vizituar vendin tonë e kishte ndihmuar ambasadori Bashkim Dino.

“Unë e kujtoj shumë mirë atë moment, sepse babai im sapo kishte kaluar një infarkt. Më kishte kërkuar mua, si më të madhin e fëmijëve, që para se 'unë të vdes duhet të më çosh në Shqipëri'. Në Romë në atë kohë ishte ambasadori Bashkim Dino, kështu quhej dhe i kërkova leje, nëse mund të na ndihmonte. Dhe më tha, pas 6 muajsh është një grup që niset. Dhe unë këmbëngula, i thashë: Ambasador, babai im sapo ka kaluar një infarkt dhe më ka kërkuar që para se të vdesë dëshiron të vizitojë atë zonë të Shqipërisë ku ka qenë ushtar me detyrim...

Atëherë ai më tha më jep dy ditë kohë. Dhe ashtu ndodhi. Më thirri dhe më tha 'Albano a doni të niseni, për nga Kakavija do të jetë një delegacion që do t’ju shoqërojë për në Gjirokastër. Shkuam në Gjirokastër dhe pastaj u kthyem. Herën e parë. Herën e dytë erdhëm deri në Tiranë, në 1987. Kështu kur Romina ishtë shtatzënë, unë përfitoja nga rasti për të bërë ato gjëra që në rrethana të tjera nuk do të kisha mundur…”, u shpreh ai për "Report Tv".

Gjithashtu këngëtari foli edhe për gjendjen e vështirë ekonomike të shqiptarëve në kohën e regjimit komunist.

“Në fakt unë jam trajtuar mirë, por kam parë Shqipërinë e asaj kohe në çfarë kushtesh jetonte. Më kujtohen ata kamionët kinezë plot me njerëz. Më kujtohen malet plot me dhi të zeza dhe shumë gomerë... Një Shqipëri shumë e varfër... ku ndihej se kishte një regjim që imponohej dhe krijonte trysni, në spiralen normale të lirisë...”, tha artisti.

Më tej, ai u ndal te koncerti që mbajti në Tiranë në vitin 1989 dhe te mënyra se si e përjetuan shqiptarët këngën “Liberta”.

"Mua më kujtohet diçka shumë e çuditshme. Sepse mbrëmjen e parë këndova në Pallatin e Kongreseve. Dhe ishte një pjesë e publikut që duartrokiste, ndërsa një pjesë tjetër dukej se i krijonte bezdi, ngrihej... Dhe unë pyesja veten: Çfarë dreqin po ndodh këtu. Sepse nuk dija asgjë...

Mbrëmjen tjetër, në stadium, aty ka qenë një shpërthim total... Mbaj mend se erdhi Sigurimi afër meje dhe më tha: Nëse sot ndodh ndonjë incident dije se faji do të jetë vetëm yti. Dhe unë u thashë: Pra, ju mos ndoshta po më kërkoni që të resht së kënduari... Dhe ata ma kthyen: Jo, jo ti e kuptove mirë se ç’duam të themi...

Nuk më penguan! Vetëm kur zbrita në mes të publikut për të kënduar 'O sole mio', që është një moment i jashtëzakonshëm... Këtu më thanë ato fjalë që duhej të tregohesha i kujdesshëm që mos të ndodhte gjë. Dhe unë u thashë, 'jam këtu për të kënduar, jo për të krijuar kaos...', nënvizoi Albano Carrisi./ B.A. – CNA.al





Lajmet e fundit nga