E fundit!

15:45 Aktualitet

46 ditë protestë/ Mbahet sot tubimi i radhës kundër qeverisë

Pasditen e sotme në Tiranë para Kryeministrisë mbahet prot...

Akademiku Ali Aliu feston 90-vjetorin e lindjes

1 Prill 2024, 20:17, Kulturë Sadik Bejko

Është një ditë e shënuar për kulturën shqiptare. Akademiku sot Ali Aliu shënon plot 90-vjeç.

Ali Aliu është nga zona toske, ka lindur në trevat shqiptare nga ana tjetër lindore e liqenit të Prespës. Nëna e tij është nga Erseka.

Ai është një "udhëtar" i palodhur që me hapin e tij i ka bërë bashkë gjithë trevat shqiptare tej e përtej kufinjve.

E kam takuar në Shkup, e më ka pritur në banesën e tij, po ashtu dhe në Prishtinë. Është një burrë aq miqësor sa ta bën borxh me sjelljen e tij të butë dhe pa asnjë nga sto manitë shqiptare për t'u dukur, për pak protagonizëm, siç thonë sot.

Aliu është miku i mrekullueshëm që vetëm me sytë e tij të zgjuar, të qeshur, fluturakë mund të shprehë shumë. Fytyra e tij e paqtë, gjuha e trupit e çtendosur, buzëqeshja, zëri karakteristik i shtruar, e qeshura spontane krejt e shlirët, sytë xixëllues, ta bëjnë të afërt e të kërkuar shoqërinë e këtij burri jo aq të zakonshëm.

Por ai është i tillë i përkushtuar aq pozitivisht, palodhshëm në vëmendjen për të të dëgjuar sa herë që ta takosh.

Dhe gjithmonë është prof Ali Aliu. Njeriu që me laps në dorë ka lexuar dhe ndjekurgjithë librat, botimet në Shkup, në Tetovë, në Tiranë, në Fier, në Prishtinë...Jo vetëm i ka lexuar po dhe i ka peshuar në atë balancën prej argjendi plot dritë të njeriut që e ka jo vetëm për zeje, pasion, gjykimin mbi librat, mbi të gjitha e ka një mision të madh.

Kam menduar se nën atë qetësinë aq harmonike, nën atë buzëqeshjen e tij të pafaj, pulson një ankth prej gjahtari në ndjekje të vlerave letrare kudo që të ndodhen në katër a pesë Shqipëritë tona siç thoshte i ndjeri Podrimja. Ky njeri kaq i urtë, kaq i sjellë i pagabueshëm në butësinë, në tolerancën, durimin e tij me të gjithë që i afrohen, kush e di me ç' pasion e padurim i shfleton, i lexon, u kthehet prapë... librave në prozë e në poezi.

Ka një gjakim të ngulitur fory, të lindur, të ujdisur me gjakun e nervat e tij më të holla ky përkushtim i tij dhjetra vjeçar në ndjekje të vlerave letrare gjithëshqiptare. Unë personalisht i jam mirënjohës për leximet mbi poezinë time. Por e quaj privilegj që kam qenë nën miqësinë, shoqërinë e tij e një bisede e një kafeje e një takmi me Prof Ali Aliun.

I uroj Aliut shëndet dhe jetë. Të jetë i lumtur me ata që i do më shumë, me familjen, gjakun e tij. Të jetë kështu i gëzuar, plot vitalitet me gjithë bashkëpunëtorët e miqtë e tij në të katër anët e trojeve shqiptare.

Efhe 100 Profesor Ali Aliu!