Sekuestrohen 5 armë, municion dhe heroinë/ 3 të arrestuar në Gjirokastër, 2 në kërkim

5 Nëntor 2025, 10:56, Kronika CNA

Sekuestrohen 5 armë, municion dhe heroinë/ 3 të arrestuar në

Një aksion policor në zonën e Gjirokastrës është finalizuar me sekuestrimin e 3 armëve zjarri, 1 armë gjahu, 1 armë e ftohtë bajonetë, municion luftarak, një sasi heroine, 300 fara kanabisi dhe një shumë parash.

Sekuestimet u kryen si rezultat i një hetimi disajavor, me metoda proaktive, gjatë operacionit policor të koduar “Interruption”.

3 shtetas u arrestuan dhe 2 të tjerë u shpallën në kërkim, të cilët posedonin sendet e kundërligjshme, në 3 banesa në lagjen "Zinxhira" dhe në fshatin Bënçë.

Njëri prej të arrestuarve ishte me precedent për trafikim të lëndëve narkotike.

Njoftimi:

Si rezultat i një hetimi që u ndoq për disa javë, me metoda proaktive, në koordinim me Prokurorinë e Gjirokastrës, për të dokumentuar veprimtaritë kriminale të disa shtetasve, në fushën e shpërndarjes së lëndëve narkotike dhe armëmbajtjes pa leje, specialistët e Seksionit për Hetimin e Narkotikëve dhe Trafiqeve, në bashkëpunim me specialistët e Sektorit Operacional, me shërbimet e Forcës së Posaçme "Shqiponja", me shërbimet e Komisariatit të Policisë Gjirokastër dhe shërbimet e Komisariatit të Policisë Tepelenë, finalizuan opëracionin “Interruption”.

Në kuadër të këtij operacioni:

-u arrestua shtetasi Ç. B., 57 vjeç (me precedent për trafikim të lëndëve narkotike), u arrestua djali i tij 14 vjeç, si dhe u shpall në kërkim djali tjetër i tij, shtetasi E. B., 19 vjeç, pasi në banesën e tyre, në lagjen "Zinxhira", u gjetën: 1 armë zjarri kallashnikov, 1 armë zjarri pistoletë, 1 armë gjahu dhe municion luftarak;

-u shpall në kërkim shtetasi A. B., 25 vjeç (djali i vëllait të 57-vjeçarit), pasi në banesën e tij, në lagjen "Zinxhira", u gjetën: 1 bajonetë, 300 fara të dyshuara narkotike Cannabis Sativa, një sasi lënde e dyshuar narkotike Heroinë, municione luftarak, 10 000 euro dhe 100 000 lekë;

-u arrestua shtetasi A. S., 21 vjeç, pasi në banesën e tij, në fshatin Bënçë, u gjetën 1 armë zjarri kallashnikov dhe municion luftarak.

Vijon puna për kapjen e shtetasve të shpallur në kërkim, E. B. dhe A. B. (kushërinj).

Materialet procedurale iu referuan Prokurorisë së Gjirokastrës, për veprime të mëtejshme./CNA