E fundit!

11:00 Denoncim

Dokumenti/ Familjarët e vrasësit të policit në Maliq përfituan fonde nga AZHBR

Vrasja e efektivit Enea Mekolli në krye të detyrës ka nxje...

‘Rrugorja’ e Lezhës shton kontrollet në akse/ Arrestohen 7 drejtues automjetesh, 1420 gjoba

11 Nëntor 2025, 11:01, Kronika CNA

Policia Rrugore e Lezhës ka nisur një aksion me ‘dorë të hekurt’ në akset e qytetit, si dhe ato nacionale.

Aksidenti i së shtunës në aksin rrugor Lezhë-Milot, ku mbeten të vdekur 2 persona, pas përplasjes së dy automjeteve ku shkak i ngjarjes rezultoi konsumimi i alkoolit, ka vënë në lëvizje policinë rrugore, të cilët kanë shtuar kontrollet dhe monitorimet në të gjitha akset rrugore të qarkut, duke përdorur teknologjitë më bashkëkohore të kontrollit, përfshirë dronët, me qëllim parandalimin e aksidenteve dhe përmbushjen e parametrave të sigurisë rrugore.

Sipas të dhënave, si rezultat i këtyre veprimeve, 7 drejtues mjetesh janë arrestuar, ndërsa 2 të tjerë janë proceduar penalisht, për veprat penale “drejtimi i mjeteve në mënyrë të parregullt” dhe “shkelja e rregullave të qarkullimit rrugor”.

Gjithashtu janë vendosur 1420 masa administrative për shkelje të ndryshme të kodit rrugor, konkretisht, 39 për mosvendosjen e rripit të sigurimit, 48 për mosvendosjen e kaskës mbrojtëse, 72 për përdorimin e celularit gjatë drejtimit të mjetit, 36 për drejtim mjeti nën efektin e alkoolit, 35 për përdorimin e xhamave të errësuar, 205 për parakalime të gabuara, 198 për ndalim apo qëndrim të gabuar, 658 për tejkalim të shpejtësisë së lejuar, 39 për mosdhënie përparësie këmbësorëve dhe 90 për shkelje të tjera të Kodit Rrugor.

Policia Rrugore bën të ditur se kontrollet do të vijojnë me intensitet të lartë në të gjitha akset rrugore urbane, interurbane dhe rurale të qarkut Lezhë, me fokus respektimin e rregullave të qarkullimit dhe rritjen e sigurisë për të gjithë.

Gjithashtu u kërkohet të gjithë drejtuesve të automjeteve që të respektojnë me rigorozitet rregullat e qarkullimit rrugor, të shmangin parakalimet e gabuara, përdorimin e celularit gjatë drejtimit të mjetit dhe drejtimin nën efektin e alkoolit, në mënyrë që të shmangen aksidentet rrugore dhe të garantohet siguria për të gjithë.

Akset e Qarkut Lezhë vijojnë të jenë ndër më problematiket sa i takon aksidenteve rrugore, ndaj masa të tillla kanë për qëllim ndërgjegjësimin e drejtuesvë të automjeteve për respektim të sinjaliatikës./CNA