Rrefehet biznesmeni Marku/ Konflikti për pronat me Pëllumb Gjokën dhe atentati ndaj djalit

13 Shtator 2023, 22:45, Kronika CNA

Rrefehet biznesmeni Marku/ Konflikti për pronat me Pëllumb Gjokën

Biznesmeni Pëllumb Gjoka, tashmë në qeli, është denoncuar për përvetësimin e tokave në Velipojë.

Gjatë këtij procesi ai është hasur me kundërshtinë e pronarëve të vërtetë të tokave, një ndër të cilët edhe Dedë Marku.

Ky i fundit, pronar i një lokali, ka treguar në emisionin e Klodiana Lalës përballjen me Pëllumb Gjokën.

Ai tha se në vitin 2012, kur edhe nisi konflikti, Pëllumb Gjoka i mësyu në lokalin e tij dhe i kërkoi që të largohej nga toka, me pretendimin se pavarësisht se lokali ishte me letra, objekti ishte ndërtuar në truallin e tij.

Marku zbulon se biznesmeni e kishte kërcënuar dhe ishin betuar për konflikt, i cili ishte degjeneroi deri në përdorimin e armëve.

“Pëllumb Gjoka i shkatërroi se bëri dokumente false për atë vend aty.

Ranë ishte ajo, buzë detit, se na kena aty qysh në vitin 1997. Paguajmë taksat vit për vit, edhe atëherë ai na sulmoi masandej tek lokalet, tu na prishë në 2012, në 2020”, u shpreh ai.

Dedë Marku deklaroi se në 11 mars të 2013-ës u krye atentati ndaj djalit të tij, Viktorit, për të cilin sigurisht akuzon biznesmenin.

Viktori ishte duke udhëtuar me kamionin e tij “Benz” kur 3 persona të armatosur me kallashnikov e me maska i prenë rrugën dhe qëlluan me breshëri, por fatmirësisht ai nuk pësoi dëmtime.

Bëmat e Pëllumb Gjokës/ Grabiti tokën e hallës në Velipojë, si u falsifikua prokura e 99-vjeçares
13 Shtator, 22:33

“Katër vetë, tre automatikë, 300 fishekë, në 12 të ditës, me makinë policie, me rrobe ushtarake. Ky i kishte vesh, ky i kishte financue, Pëllumbi…”, rrëfen ai, ndërsa tregoi se djali i tij kishte pasur një konflikt me Ardian Becin, kushëririn e Pëllumb Gjokës.

Dedë Marku zbuloi se pas kësaj ngjarjeje shkoi të takojë personalisht Pëllumb Gjokën, por ky i fundit iu shmang.

“Unë kam pas 1 javë që kam ardh me u taku me ta. Mu më ka thënë se ka vi…me qenë djali jot në vorr tash. Atëherë s’ka vonu një javë edhe ka kry atentatin ai. Kena pas komunikime mas do kohësh, me një fjalë, jo me Pëllumbin po me do njerëz të tjerë. Kena bisedue. E kena bo ne na kanë thanë,”, u shpreh Dedë Marku.

Në dosjen hetimore janë zbardhur bisedat mes Ardian Becit dhe familjarëve të tij, ku qartazi shihet se ata porosisin njëri-tjetrin të mos bien në kundërshti me deklaratat para hetuesve.

Këto biseda janë kapur nga një përgjim ambiental që Prokuroria e Shkodrës ka kryer në vitin 2020, në lidhje me ngjarjen.

Nga ana tjetër, Pëllumb Gjoka në dëshminë dhënë para policisë, ‘mbron’ të afërmit e tij, pra anëtarët e familjes Beci./ CNA