E fundit!

16:41 Aktualitet

Marshim dhe thirrje kundër qeverisë/ Mbahet sot protesta e 45-të në Tiranë

Ditën e sotme mbahet protesta e 45-të qytetare kundër qeve...

Policia, informacion zyrtar për helmimin e studentëve të Akademisë së Sigurisë/ Ja si paraqitet gjendja

7 Maj 2026, 09:40, Kronika CNA

Policia, informacion zyrtar për helmimin e studentëve të

Policia e Tiranës ka bërë një njoftim zyrtar në lidhje me helmimin e studentëve të Akademisë së Sigurisë.

Në njoftimin e bërë, thuhet se 56 studentë dyshohet se janë helmuar pas konsumimit të ushqimit në ambientet e Akademisë.

Sa i përket gjendjes së tyre shëndetësore, policia bën me dije se pasi morën ndihmën e nevojshme mjekësore, të gjithë studentët kanë dalë nga spitali në gjendje të mirë.

Policia njofton se në lidhje me rastin janë arrestuar dy persona, një tjetër është shpallur në kërkim si dhe është proceduar një shtetase, me detyrë teknologe në kompaninë që ofronte ushqimin.

Ndaj tyre rëndon akuza për “Importim, prodhim, shitje dhe ruajtje e ushqimeve të rrezikshme për shëndetin ose jetën e njerëzve”.

Njoftimi i policisë

Dje, janë dërguar për ndihmë mjekësore në Repartin Infektiv të QSUT-së, 56 studentë të Akademisë së Sigurisë, të cilët dyshohet se janë helmuar pas konsumimit të ushqimit në ambientet e Akademisë së Sigurisë.

Të gjithë studentët morën ndihmën e nevojshme mjekësore dhe kanë dalë nga spitali, në gjendje të mirë shëndetësore.

Specialistët për Hetimin e Krimeve të Komisariatit të Policisë Nr. 1, në vijim të veprimeve hetimore të kryera në drejtimin e Prokurorisë së Tiranës, për këtë rast:

-arrestuan në flagrancë shtetasit K. B., 52 vjeç dhe K. P., 23 vjeçe, me detyra respektive kuzhinier dhe teknologe ushqimi në kompaninë e kontraktuar për të ofruar ushqim në Akademinë e Sigurisë;

-referuan materialet në Prokurori ku nisi procedimi në gjendje të lirë për shtetasen R. Ç., 35 vjeçe, me detyrë teknologe ushqimi në këtë kompani;

-shpallën në kërkim administratoren e kompanisë, shtetasen A. T., 52 vjeçe.

Punohet për kapjen e shtetases A. T., individualizimin dhe dokumentimin e përgjegjësisë penale të shtetasve të përfshirë në këtë rast.

Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprën penale “Importimi, prodhimi, shitja dhe ruajtja e ushqimeve të rrezikshme për shëndetin ose jetën e njerëzve”.

Helmimi i studentëve të Akademisë së Sigurisë ngre një pikëpyetje se çfarë ndodh me shërbimet e kateringut në institucione dhe sa të sigurta janë për jetën e qytetarëve.