Humbja e shefit të reanimacionit/ Sot mbahen homazhe, kolegët shprehin ngushëllimet e përzemërta

23 Dhjetor 2022, 09:28, Kronika CNA

Humbja e shefit të reanimacionit/ Sot mbahen homazhe, kolegët shprehin

Ditën e djeshme mjeku i shquar, shefi i reanimacionit në QSUT, Ilir Ohri, u nda nga jeta në moshën 67-vjeçare.

Ai sot do të përcillet për në banesën e fundit. Ndërkohë homazhet për Prof. Ilir Ohrin do të mbahen sot në hollin e Godinës Qendrore të UMT nga ora 12-13!

Humbja e tij u pasua me një trishtim të madh edhe në radhët e kolegëve të tij, të cilët shprehën ngushëllimet e tyre më të përzemërta, për mikun dhe kolegun e tyre gjenial.

Ishte Shoqata e Anestezistëve dhe Reanimatorëve të Shqipërisë që bëri me dije lajmin e trishtë, ku përmes një statusi në rrjetet sociale evidentuan kontributet e Ohrit në sistemin shëndetësor të vendit tonë.

Ohri ishte një nga themeluesit e Shoqatës së Anestezi-Reanimacionit dhe një nga drejtuesit aktivë të saj.

Reagimi i Shoqatës së Anestezistëve dhe Reanimatorëve të Shqipërisë:

Me hidhërim te thellë ju njoftojmë se u nda nga jeta Prof.Ilir Ohri.

Prof.Ilir Ohri lindi më 27.11.1955.

Prof.Ilir Ohri, një prej figurave më të shquara të Shërbimit të Anestezi-Reanimacionit dhe t? mjek?sis? shqiptare, ka dhënë prej më shumë se 40 vitesh një kontribut të veçantë dhe të jashtëzakonshëm në zhvillimin e këtij shërbimi në vendin tonë.

Ai ishte një nga themeluesit e shërbimit modern të Anestezi-Reanimacionit dhe drejtues i tij prej 30 vitesh.

Prof. Ilir Ohri ka lënë gjurmën e tij në ngritjen, funksionimin dhe perfeksionimin e të gjitha njësive të reanimacionit në Tiranë e në mbarë vendin.

Ai bën pjesë në bërthamën e shkëlqyer të mjekëve, që themeluan Shkollën e Anestezi-Reanimacionit që në gjysmën e parë të viteve ’80.

Prof. Iliri i ka ndarë pa kursim dijet e tij të gjera ndër vite, me qindra mjekë anestezistë, të cilët i janë mirënjohës dhe janë krenarë, që kanë qënë nxënës të tij.

Një nga kulmet e veprimtarisë së Prof. Ohrit në fushën akademike është edhe krijimi i Shkollës së Anestezi-Reanimacionit në Republikën e Kosovës dhe përgatitja e një plejade specialistësh të fushës atje. Gjithashtu, ai ka udhëhequr mjaft doktoratura në Universitetin e Prishtinës.

Veprimtaria shkencore e Prof. Ohrit është e gjërë, cilësore dhe e larmishme. Ajo pasqyrohet jo vetëm në aplikimin klinik të të rejave bashkëkohore të fushës, por edhe në artikujt e referimet e shumtë në shtypin shkencor kombëtar e ndërkombëtar.

Ai ishte një nga themeluesit e Shoqatës së Anestezi-Reanimacionit dhe një nga drejtuesit aktivë të saj.

Gjatë gjithë jetës profesionale Prof. Ilir Ohri është karakterizuar nga puna e pakursyer në shërbim të të sëmurëve më të rëndë, nga ndershmëria e lartë, nga profesionalizmi i rrall?, nga integriteti solid dhe nga personaliteti i palëkundur.

Anestezi-Reanimacioni shqipëtar humbi mësuesin, drejtuesin dhe mjekun e talentuar.

Shoqata e Anestezistëve dhe Reanimatorëve te Shqipërisë i shpreh ngushëllimet më të sinqerta familjes, miqve dhe shokëve të tij.

Gjithashtu ka pasur reagime edhe nga kolegë të tjerë, si mjeku dhe politikani Ilir Alimehmeti, i cili përmes një statusi në rrjetet sociale ka shprehur ngushëllimet për kolegun e tij.

Edhe ministrja Ogerta Manastirliu ka shprehur ngushëllimet për humbjen e një profesionisti të rrallë si Prof. Dr. Ilir Ohri.

Po ashtu shumë kolegë e deputetë të tjerë shprehën dhimbjen e tyre për humbjen e një figure, një miku dhe një kolegu si profesori.