web counter
LEXO PA REKLAMA!

SHKARKO APP

App Store
Google Play

Goditet grupi kriminal/ Mashtronin të moshuarit dhe i zhvasnin para

30 Qershor 2023, 17:02, Kronika CNA

Goditet grupi kriminal/ Mashtronin të moshuarit dhe i zhvasnin para

Europol ka gjurmuar dhe arrestuar kreun e një rrjeti kriminal, përgjegjës për mashtrimin e qindra qytetarëve të moshuar.

Arrestimi erdhi si rrezultat i bashkëpunimit të forcave të rendit nga Gjermania, Polonia dhe Mbretëria e Bashkuar, organizim ky i mbështetur nga Europol.

 I dyshuari u arrestua në afërsi të Londrës, nga ku drejtonte një rrjet mashtruesish që synonin kryesisht shtetas gjermanë dhe polakë.

Gjatë ekzekutimit të urdhrit të arrestit të lëshuar nga autoritetet polake, oficerët konfiskuan prova të rëndësishme si telefonat celularë në banesën e një prej të dyshuarve. Ndërkohë, policia gjermane ka zbuluar dhe sekuestruar mbi 160 000 euro para cash, shufra ari, monedha ari, stoli, telefona dhe pajisje të tjera elektronike.

Rrjeti i organizuar kriminal ishte i specializuar në thirrjen e qytetarëve të moshuar në të gjithë Gjermaninë dhe Poloninë.

Ata shtireshin si oficerë policie ose si përfaqësues të autoriteteve zyrtare. Viktimave u thuhej se një nga të afërmit e tyre ka qenë përgjegjës për një aksident automobilistik ose ngjarje të ngjashme me pasojë plagosjen ose ndarjen nga jeta të personave të tjerë. Telefonuesi mashtrues më pas i dorëzonte telefonin një bashkëpunëtori, i cili qante ose bërtiste në telefon furishëm, duke iu lutur objektivit që t'i jepte ndihmë.

Kjo synonte të vinte nën trysni të moshuarin dhe të paguante para për të shmangur ndalimin e të afërmit fals.

Kriminelët e udhëzonin viktimën për procedurën e pagesës, pastaj dërgonin një person për të mbledhur paratë tek objektivi. Për të minimizuar ekspozimin dhe për të shmangur rrezikun e arrestimit, rrjeti kriminal rekrutoi bashkëpunëtorë “naivë” për këtë detyrë, nëpërmjet platformave online të punës. Ata nuk e dinin që veprimtaria e tyre ishte ilegale dhe kriminale.

Gjatë hetimeve u arrestuan mbi 70 persona që merrnin pjesë në këtë mashtrim, teksa po mblidhnin para./ CNA.al





Lajmet e fundit nga