E fundit!

12:43 Aktualitet

Helmimi i kursantëve të Akademisë së Sigurisë/ Reagon Sori-Al: Futen ushqime nga jashtë

Kompania Sori-Al ka reaguar në lidhje me helmimin e 60 kur...

Vrasja e dy grave në Kosovë, Vjosa Osmani shpall të mërkurën ditë zie

16 Prill 2024, 16:56, Kosova & Bota CNA

Vrasja e dy grave në Kosovë, Vjosa Osmani shpall të

Presidentja e Kosovës, Vjosa Osmani

Presidentja e Kosovës, Vjosa Osmani e ka shpallur të mërkurën e 17 prillit ditë zie, pas vrasjes së dy grave brenda pak ditëve.

“Nesër do të jetë ditë zie shtetërore në Kosovë, por shoqëria jonë do të jetë në zi çdo ditë përderisa të ketë vrasje të grave dhe vajzave tona!” shkroi Osmani në rrjetin social Facebook.

Mëngjesin e së martës u vra një grua në Pejë nga bashkëshorti i saj.

Shkodran Nikqi, zëdhënës i Prokurorisë Themelore në Pejë, tha se i dyshuari është arrestuar dhe se atij i është konfiskuar arma.

Vrasja në Pejë është rasti i dytë brenda katër ditësh në Kosovë ku gratë dyshohet se u vranë nga partnerët apo ish-partnerët e tyre.

Më 12 prill u vra një grua 21-vjeçare brenda zyrës së Qendrës për Punë Sociale në qytetin juglindor të vendit, Ferizaj, ndërsa u plagos edhe vëllai i saj 15-vjeçar.

Një 36-vjeçar, ish-bashkëshorti i viktimës, është arrestuar dhe paraburgosur nga autoritetet si i dyshuari për vrasjen.

Nga viti 2010 në Kosovë janë vrarë 57 gra, sipas të dhënave të Policisë së Kosovës.

Presidentja Osmani e dënoi vrasjen në Pejë, duke theksuar se të gjithë e kanë për detyrë të mbrojnë gratë dhe vajzat.

“Fatkeqësisht, sot të gjithë jemi zgjuar në mëngjes me lajmin e tmerrshëm për vrasjen edhe të një gruaje nga bashkëshorti i saj. Ky fenomen i tmerrshëm që po e plagos shoqërinë dhe shtetin tonë, ky femicid i cili për fat të keq ka marrë përmasa të jashtëzakonshme, duhet të ndalet me çdo kusht”, tha Osmani.

Për vrasjen në Pejë reagoi edhe ministrja e Drejtësisë, Albulena Haxhiu, e cila tha se pavarësisht “masave të ndërmarra, fushatave të iniciuara me qëllim pikërisht barazinë gjinore, vrasjet ndaj grave po vazhdojnë”.

Ajo tha se ka thirrur për sot një takim me ministrin e Punëve të Brendshme, kryesuesit e këshillave, ushtruesin e detyrës së kryeprokurorit dhe drejtorin e Policisë së Kosovës dhe “po ashtu në një takim tjetër edhe mbledhjen e grupit ndërministror” për të trajtuar çështjen e vrasjes së grave./ CNA