E fundit!

11:24 Aktualitet

Emrat/ Kush pritet të marrin drejtimin e policisë në Tiranë, Durrës, Fier, Lezhë, Kukës dhe Vlorë

Mbyllet procesi i vlerësimit për kandidatët që synojnë të ...

Von der Leyen përballet sërish me mocion mosbesimi

15 Janar 2026, 08:25, Kosova & Bota CNA

Presidentja e Parlamentit, Roberta Metsola, informoi krerët e grupeve parlamentare se Komisioni Europian, i drejtuar nga Ursula von der Leyen, do të përballet me një tjetër mocion mosbesimi. Debati dhe votimi do të zhvillohen në seancën parlamentare javën e ardhshme në Strasburg. Ky është mocioni i katërt i mosbesimit kundër Von der Leyen dhe ekipit të saj brenda një gjysmë viti.

Mocioni i katërt i mosbesimit

Mocioni u paraqit nga grupi i djathtë "Patriotët për Europën", i cili kritikon Von der Leyen dhe ekipin e saj kryesisht për marrëveshjen tregtare Mercosur me vendet e Amerikës së Jugut, Brazilin, Argjentinën, Uruguain dhe Paraguain. Grupi "Patriotët për Europën" përfshin, ndër të tjerë, anëtarë të partisë Franceze të Marine Le Pen, Rassemblement National, si dhe anëtarë të partisë së kryeministrit hungarez Viktor Orbán.

Që një mocion mosbesimi të debatohet dhe të hidhet në votim në Parlamentin e BE-së, ai duhet të mbështetet nga të paktën një e dhjeta e 719 anëtarëve aktualë të parlamentit.

Të djathtët kritikojnë shpërfilljen e parlamenteve të vendeve anëtare
Grupi parlamentar "Patriotët për Europën" kritikoi në deklaratën lidhur me mocionin e mosbesimit "shpërfilljen flagrante të Parlamentit Europian, të parlamenteve kombëtare dhe të miliona fermerëve europianë" në rastin e nënshkrimit të marrëveshjes Mercosur. Marrëveshja përfaqëson një sulm të drejtpërdrejtë ndaj sigurisë dhe sovranitetit ushqimor europian dhe hap tregjet për produkte që nuk përmbushin standardet europiane, thuhet në deklaratë.

Por mocioni i mosbesimit nuk do të arrijë ta pengojë nënshkrimin e marrëveshjes. Nënshkrimi i saj është planifikuar të zhvillohet këtë të shtunë në Paraguai, ku do të shkojnë edhe Ursula von der Leyen dhe Presidenti i Këshillit të BE-së António Costa.

Mocionet e mëparshme të mosbesimit pa sukses

Mocioni i mëparshëm i mosbesimit i grupit parlamentar "Patriotët për Europën" kundër Von der Leyen dhe komisionit të drejtuar prej saj dështoi në votimin e tetorit 2025 me 378 eurodeputetë që votuan kundër tij kundrejt 179 që votuan pro. Për miratimin e mocionit të mosbesimit është e nevojshme një shumicë prej dy të tretash e votave. Megjithatë, për herë të parë, në atë votim kundër Von der Leyen dhe komisionit të saj votuan edhe eurodeputetë nga grupi PPE i partive demokristiane, së cilës i përket edhe Von der Leyen si politikane e CDU-së.

Po në tetor 2025 Komisioni i mbijetoi gjithashtu një mocioni mosbesimi nga grupi i partive të majta, që kishte si zanafillë ndër të tjera marrëveshjen doganore të BE-së me SHBA-në dhe qëndrimin ndaj katastrofës humanitare në Rripin e Gazës. Edhe një mocion i mëparshëm mosbesimi në korrik 2025 dështoi gjithashtu.

Mocionet e mosbesimit mund të kërkohen vetëm kundër të gjithë Komisionit. Nëse mocioni ka sukses atëherë i gjithë Komisioni duhet të japë dorëheqjen./DW