"Të respektohet vullneti i popullit"/ Deklarata e Bashkimit Europian për zhvillimet në Venezuelë

4 Janar 2026, 21:36, Kosova & Bota CNA

"Të respektohet vullneti i popullit"/ Deklarata e Bashkimit

Bashkimi Evropian ka bërë thirrje që të respektohet vullneti i popullit venezuelian, një ditë pasi Shtetet e Bashkuara rrëzuan Presidentin Nicolas Maduro, duke thënë se kjo ishte e vetmja mënyrë për të zgjidhur krizën.

Duke folur në emër të 26 vendeve (të gjitha shteteve anëtare përveç Hungarisë), shefja e politikës së jashtme të BE-së Kaia Kallas u bëri thirrje të gjithë aktorëve të tregojnë qetësi dhe përmbajtje në mënyrë që të shmanget përshkallëzimi dhe të sigurohet një zgjidhje paqësore e krizës.

"Respektimi i vullnetit të popullit venezuelian mbetet e vetmja mënyrë që Venezuela të rivendosë demokracinë dhe të zgjidhë krizën aktuale", thuhet ndër të tjera në deklaratë.

Deklarata e plotë e Bashkimit Evropian:

Bashkimi Evropian bën thirrje për qetësi dhe përmbajtje nga të gjitha palët e përfshira, me qëllim që të shmanget përshkallëzimi dhe të sigurohet një zgjidhje paqësore e krizës.

BE-ja kujton se, në të gjitha rrethanat, parimet e së drejtës ndërkombëtare dhe Karta e OKB-së duhet të respektohen. Anëtarët e Këshillit të Sigurimit të Kombeve të Bashkuara mbajnë një përgjegjësi të veçantë për ruajtjen e këtyre parimeve, si themeli i arkitekturës ndërkombëtare të sigurisë.

BE-ja ka deklaruar vazhdimisht se Nicolas Maduro nuk ka legjitimitetin e një presidenti të zgjedhur në mënyrë demokratike dhe ka mbështetur një tranzicion paqësor drejt demokracisë, të udhëhequr nga Venezuela, duke respektuar sovranitetin e vendit. E drejta e popullit venezuelian për të përcaktuar të ardhmen e vet duhet të respektohet.

Bashkimi Evropian ndan përparësinë e luftimit të krimit të organizuar ndërkufitar dhe trafikut të drogës, të cilat përbëjnë një kërcënim serioz për sigurinë globale. Në të njëjtën kohë, BE thekson se këto sfida duhet të adresohen përmes bashkëpunimit të vazhdueshëm, në respekt të plotë të së drejtës ndërkombëtare dhe parimeve të integritetit dhe sovranitetit territorial.

Ne jemi në kontakt të ngushtë me Shtetet e Bashkuara, si dhe me partnerët rajonalë dhe ndërkombëtarë, për të mbështetur dhe lehtësuar dialogun me të gjitha palët e përfshira, me qëllim një zgjidhjeje të negociuar, demokratike, gjithëpërfshirëse dhe paqësore të krizës, të udhëhequr nga vetë venezuelasit.

Respekti për vullnetin e popullit venezuelian mbetet e vetmja rrugë për rivendosjen e demokracisë dhe zgjidhjen e krizës aktuale në vend.

Në këtë moment kritik, është thelbësore që të gjitha palët e përfshira të respektojnë plotësisht të drejtat e njeriut dhe të drejtën ndërkombëtare humanitare. Të gjithë të burgosurit politikë që aktualisht mbahen të ndaluar në Venezuelë duhet të lirohen pa kushte.

Autoritetet konsullore të shteteve anëtare të BE-së po koordinohen ngushtë për të siguruar mbrojtjen dhe sigurinë e qytetarëve të BE-së, përfshirë ata që mbahen të ndaluar ilegalisht në Venezuelë. /CNA