"Të humbasë peshë dhe të ushtrohet më shumë"/ Publikohen rezultatet e kontrollit mjekësor të Trump

30 Maj 2026, 10:35, Kosova & Bota CNA

"Të humbasë peshë dhe të ushtrohet më

Shtëpia e Bardhë publikoi të premten në mbrëmje rezultatet e kontrollit mjekësor të presidentit Donald Trump, duke shpërndarë një raport nga mjeku i tij personal, i cili thekson se presidenti gëzon shëndet të shkëlqyer.

Mjeku bëri me dije se presidenti është plotësisht i aftë për të kryer të gjitha detyrat e Komandantit të Përgjithshëm dhe Kreut të Shtetit.

“Presidenti Trump mbetet në gjendje të shkëlqyer shëndetësore, duke demonstruar funksion të fortë kardiak, pulmonar, neurologjik dhe fizik në përgjithësi. Performanca njohëse dhe fizike është e shkëlqyer. Ai është plotësisht i aftë për të kryer të gjitha detyrat e Komandantit të Përgjithshëm dhe Kreut të Shtetit” shkroi mjeku i Shtëpisë së Bardhë, Dr. Sean Barbabella.

Sipas raportit, gjatë ekzaminimit presidentit iu ofruan dhe udhëzime për dietën, rekomandim për marrjen e aspirinës në dozë të ulët, rritjen e aktivitetit fizik dhe vazhdimin e humbjes së peshës.

Mjeku bëri të ditur se Trump është 1.90 metra i gjatë dhe peshon 108 kilogramë. Në kontrollin e kryer në prill të vitit të kaluar, ai peshonte 102 kilogramë.

Vizita në Qendrën Kombëtare Mjekësore Ushtarake Walter Reed, ishte hera e tretë që Trump i nënshtrohet një kontrolli mjekësor në këtë institucion që nga inaugurimi i tij si presidenti më i moshuar në historinë e SHBA-së.

Menjëherë pas ekzaminimit, Trump shkroi në rrjetin social Truth Social, ku shkroi: “Gjithçka rezultoi PËRSOSHMËRISHT.”

Që nga rikthimi në Shtëpinë e Bardhë në vitin 2025, shqetësimet e dukshme shëndetësore dhe spekulimet mbi gjendjen e tij kanë shtyrë administratën të publikojë më shumë informacion mbi gjendjen fizike të presidentit.

Shtëpia e Bardhë kishte bërë të ditur se ënjtja në këmbë dhe kyçe, e vërejtur verën e kaluar, ishte pasojë e insuficiencës kronike venoze, një gjendje ku valvulat e disa venave nuk funksionojnë siç duhet, duke lejuar grumbullimin e gjakut.

Në raportin e së premtes, mjeku i presidentit shkroi se gjatë kontrollit të fundit “u vu re një ënjtje e lehtë në pjesën e poshtme të këmbëve, me përmirësim krahasuar me vitin e kaluar”.

Presidenti ka shfaqur gjithashtu mavijosje të dukshme në duar gjatë mandatit të tij të dytë. Shtëpia e Bardhë ka deklaruar se ato janë rezultat i shtrëngimeve të shpeshta të duarve dhe janë mbuluar në fotografi me produkte kozmetike.

Ndërkohë sipas raportit mjekësor, Trump iu nënshtrua edhe një ekzaminimi të plotë neurologjik, i cili tregoi gjendje normale mendore, funksionim të paprekur të nervave kranialë, si dhe forcë, ndjeshmëri, reflekse, ecje dhe ekuilibër normal.

Lidhur me shëndetin e zemrës, mjeku deklaroi se një analizë e elektrokardiogramës (EKG) e mbështetur nga inteligjenca artificiale vlerësoi se mosha kardiake e presidentit është rreth 14 vjet më e re se mosha e tij biologjike.

Trump iu nënshtrua gjithashtu testit Montreal Cognitive Assessment (MoCA), një test 10-minutësh që përdoret për të identifikuar dëmtime të lehta njohëse dhe fazat e hershme të demencës. Sipas mjekut, presidenti mori rezultatin maksimal prej 30 pikësh nga 30 të mundshme. /CNA