Duke nisur nga viti i ardhshëm/ Britania njofton përdorimin e IA në kufi, ja për çfarë do të shërbejë

29 Maj 2026, 09:53, Kosova & Bota CNA

Duke nisur nga viti i ardhshëm/ Britania njofton përdorimin e IA

Britania e Madhe do të nisë përdorimin e teknologjisë së inteligjencës artificiale në kufijtë e saj për njohjen e fytyrës, me qëllim identifikimin e migrantëve të rritur që pretendojnë se janë të mitur. Një kompani softuerësh ka fituar kontratën për zhvillimin dhe testimin e teknologjisë, e cila do të vlerësojë moshën e personave duke analizuar fotografitë e tyre të realizuara në pikat kufitare.

Ministria e Brendshme britanike deklaroi se teknologjia do ta bëjë më të lehtë identifikimin e migrantëve të rritur që po përpiqen të manipulojnë sistemin, pasi testimet fillestare kanë treguar rezultate premtuese dhe saktësi të lartë. Megjithatë, organizata Human Rights Watch (HRW) i ka bërë thirrje qeverisë britanike të heqë dorë nga projekti, duke e cilësuar atë si “teknologji të paprovuar” që mund të cenojë të drejtat dhe mbrojtjen ligjore të fëmijëve vulnerabël.

Sipas rregullave në Britani, migrantët e pashoqëruar që konsiderohen të mitur trajtohen përmes sistemit të kujdesit social dhe jo sistemit të azilit, gjë që mund t’ua lehtësojë qëndrimin në vend. Vendimi për përdorimin e kësaj teknologjie vjen pas rritjes së vazhdueshme të numrit të emigrantëve që kalojnë Kanalin Anglez me varka të vogla dhe kërkojnë azil në Mbretërinë e Bashkuar.

Sipas të dhënave zyrtare, 111,084 persona kërkuan azil në Britani gjatë vitit që përfundoi në qershor 2025, një rritje prej 14% krahasuar me një vit më parë. Ndërkohë, në periudhën që përfundoi në mars 2026, më shumë se 6,400 migrantë që pretendonin se ishin fëmijë iu nënshtruan verifikimit të moshës në kufi, ku 43% rezultuan të ishin të rritur.

Një raport i inspektorit të pavarur të emigracionit në Britani kishte evidentuar raste ku migrantë të rritur ishin klasifikuar si fëmijë, por edhe raste ku fëmijë të vërtetë ishin identifikuar gabimisht si të rritur. Raporti theksonte se, në mungesë të një testi “plotësisht të sigurt”, është e pashmangshme që disa vlerësime të moshës të jenë të pasakta, çka mund t’u mohojë fëmijëve të drejtat dhe mbrojtjen që u takon me ligj.

Qeveria britanike kishte paralajmëruar që vitin e kaluar planet për përdorimin e inteligjencës artificiale për këtë qëllim, ndërsa këtë javë kontrata iu dha kompanisë Akhter Computers Ltd me seli në Harlow. Projekti do të kushtojë 322 mijë paund gjatë tre viteve dhe teknologjia pritet të testohet fillimisht në raste reale në qendrën e përpunimit të migrantëve “Western Jet Foil” në Dover, gjatë vitit të ardhshëm. /CNA