Strategjia e re e Ukrainës për të rimarrë territor/ Godet linjat ruse të furnizimit me dronë të pajisur me IA

30 Maj 2026, 08:38, Kosova & Bota CNA

Strategjia e re e Ukrainës për të rimarrë territor/ Godet

Forcat ushtarake të Ukrainës po intensifikojnë fushatën e tyre për të shkatërruar automjetet që furnizojnë trupat ruse përgjatë rrugëve strategjike në territoret e pushtuara, duke përdorur një teknologji të re dronësh të pajisur me inteligjencë artificiale (AI).

Gjatë javës së fundit janë konfirmuar të paktën 14 sulme ndaj automjeteve që transportonin ushqime, karburant dhe municione në rrugë kyçe që lidhin Rusinë me Krimenë dhe territore të tjera të pushtuara në jug të Ukrainës, shkruan BBC.

Analizat e Institutit për Studimin e Luftës (ISW) tregojnë se Ukraina po arrin të rimarrë më shumë territor sesa po humbet për herë të parë që nga viti 2023. Megjithëse lufta ka hyrë në vitin e saj të pestë dhe Rusia ka zgjeruar kontrollin në lindje dhe jug të Ukrainës, muajt e fundit nuk janë shënuar ndryshime të mëdha territoriale nga asnjëra palë.

Ekspertët vlerësojnë se përparimet e fundit në teknologjinë e dronëve, përfshirë sistemin e pajisur me IA të quajtur Hornet, i kanë mundësuar Ukrainës të godasë objektiva ruse në distanca më të mëdha dhe me saktësi më të lartë.

Ministri ukrainas i Mbrojtjes, Mykhailo Fedorov, deklaroi të mërkurën se strategjia e quajtur “bllokada logjistike” synon të rrisë presionin mbi ushtrinë ruse në prapavijë dhe t’i mohojë asaj mundësinë për të zhvilluar operacione të qëndrueshme sulmuese.

Të paktën 10 incidente janë regjistruar në segmentin rrugor mes kufirit rus dhe qytetit të pushtuar të Mariupol, ndërsa një tjetër sulm është raportuar në jugperëndim të Melitopol. Kjo rrugë konsiderohet jetike për furnizimin e forcave ruse në vijën e frontit dhe në Crimea.

Zyrtarët ukrainas besojnë se goditja e këtyre linjave të furnizimit mund të dobësojë aftësinë e Rusisë për të mbështetur operacionet ushtarake në territoret e pushtuara dhe të ngadalësojë ofensivat e saj në front.

Përdorimi inovativ i teknologjisë nga Ukraina tregon se lufta nuk ndodhet në një ngërç, sipas George Barros nga Instituti për Studimin e Luftës (ISW). Ai thekson se forcat ukrainase po përdorin pajisje të mekanizuara në manovra taktike që do të kishin qenë të pamundura vetëm një vit më parë.

Barros vlerëson se aftësia e Rusisë për të kryer misione depërtimi në vijën e frontit do të vazhdojë të dobësohet, pasi fushata ukrainase e sulmeve me dronë në distanca të mesme po detyron bazat logjistike dhe operacionale ruse të zhvendosen më larg frontit. Kjo, sipas tij, redukton furnizimet dhe mbështetjen për njësitë e këmbësorisë që kryejnë operacione depërtimi.

Një nga njësitë elitare të dronëve të Ukrainës, 412th Nemesis Brigade, deklaroi këtë javë se komandantët rusë kanë kufizuar lëvizjen e pajisjeve të rënda ushtarake në jug të Ukrainës dhe po përpiqen të shmangin zbulimin nga dronët duke përdorur fusha dhe rrugë të paasfaltuara. Ndërkohë, udhëheqësi i emëruar nga Rusia në zonat e pushtuara të rajonit të Kherson, Vladimir Saldo, ka urdhëruar gjithashtu kufizime për trafikun civil përgjatë kësaj rruge strategjike.

Sipas vlerësimeve të ekspertëve, zhvillimi i shpejtë i teknologjive të dronëve po ndryshon ndjeshëm mënyrën e zhvillimit të luftës, duke i dhënë Ukrainës një avantazh të rëndësishëm operacional në goditjen e linjave ruse të furnizimit dhe lëvizjes së trupave. /CNA