“Është lëshuar fletërarrest për katër persona”/ Ministri i Brendshëm maqedonas jep detaje nga tragjedia e Koçanit

16 Mars 2025, 13:55, Kosova & Bota CNA

“Është lëshuar fletërarrest për katër

Ministri i Punëve të Brendshme të Maqedonisë së Veriut, Pançe Toshkovski, në një deklaratë për mediat ka dhënë detaje nga tragjedia e Koçanit.

Toshkovski bëri me dije se 59 persona kanë humbur jetën dhe 155 janë të lënduar. Toshkovski tha se vetëm 35 viktima janë identifikuar.

Ministri i Brendshëm i RMV tha se në mesin e viktimave ishte dhe një efektiv policie, i cili ka qenë në detyrë për të zbuluar drogë dhe persona të mitur në klubin e natës.

“Deri më 11.30 sipas informatave me të cilat disponoj, kanë ndërruar jetë gjithsej 59 persona. Prej tyre, 35 janë të identifikuar. Prej të identifikuarve, 31 persona janë nga Koçani, 4 nga Shtipi. Numri i të lënduarve sipas të dhënave të fundit që mora deri në orën 12 është 155 persona. Jetën e humbi edhe një zyrtar policor nga Stacioni Policor Probishtip, i cili në momentin ka qenë i angazhuar në detyrë zyrtare, gjegjësisht ka vepruar pas planit paraprak të përgatitur për kontroll të objekteve hotelerike në pjesën e tregtisë së palejuar me drogë dhe pranisë së personave të mitur në diskotekën në fjalë”, deklaroi Toshkovski.

Ministri Toshkovski njoftoi se për tragjedinë e Koçanit janë lëshuar katër urdhërarreste, identitetet e të cilëve nuk i ka bërë të ditur për shkak të hetimeve.

Po ashtu ai nuk tha nëse ka të arrestuar apo persona të marrë në pyetje për tragjedinë e diskotekës në Koçan.

“Është shpallur fletërarrest qendror për katër persona. Nga ana e MPB-së në koordinim me Prokurorinë Publike po veprohet edhe në Ministrinë e Ekonomisë, prej ku sigurohet dokumentacioni lidhur me diskotekën në fjalë, por edhe personat e lidhur me të njëjtën. Po analizohet gjithçka që mund të jetë e lidhur me këtë ngjarje të tmerrshme. Si në pjesën e dokumentacionit ndërtimor teknik, si në pjesën e parakushteve të nevojshme për vendosjen në funksion të objektit të tillë, si në pjesën e licencave përkatëse të cilat duhej t’i posedojë e njëjta, si në pjesën e veprimit konkret gjatë kohës së ngjarjes, si në pjesën e sigurimit të njëjtit, veprim sipas rregulloreve dhe akteve nënligjore e kështu me radhë”, u shpreh Pançe Toshkovski, ministër i Punëve të Brendshme./ CNA