web counter
LEXO PA REKLAMA!

SHKARKO APP

App Store
Google Play

Lirohet politikani Ivan Vukoviç/ I ndalohet hyrja për një vit në Serbi

15 Mars 2025, 17:22, Kosova & Bota CNA

Lirohet politikani Ivan Vukoviç/ I ndalohet hyrja për një vit

Mediat serbe raportojnë se politikani malazez, nënkryetari dhe deputeti i Partisë Demokratike të Socialistëve (DPS) Ivan Vukoviç, i cili u ndalua mëngjesin e sotëm në Beograd, është liruar.

Vijesti.me shkruan se Vukoviçit i është ndaluar hyrja në Serbi për një vit për shkak të “kërcënimit të sigurisë”. Ai u ndalua nga Agjencia e Sigurisë dhe Inteligjencës (BIA) e Serbisë.

Zëvendëskryeministri për Çështjet e Jashtme dhe Evropiane, Filip Ivanoviç, njoftoi mesditën e sotme në platformën X se Vukoviç ishte i lirë dhe ishte rrugës për në Mal të Zi. Ai thotë se për këtë është njoftuar nga homologu i tij serb Marko Gjuriq.

Një burim nga DPS tha më herët se avokati që ata kishin punësuar u kishte thënë atyre se Vukoviç nuk ishte në stacionin policor të Savski Venac. Ai burim tha në atë kohë se ishte e mundur që ai të deportohej dhe të sillej në aeroport pak para fluturimit.

Vukoviçi u tha autoriteteve se ai ishte në Beograd për të shoqëruar një anëtar të familjes që ishte atje për arsye shëndetësore. Ai shpjegoi se do të ktheheshin në Mal të Zi, por gjithsesi ishte ndaluar. Vukoviç mbrëmë shpërndau në faqen e tij në Facebook një video nga protesta në Beograd./ CNA

 





Lajmet e fundit nga