Samiti online për Ukrainën/ Macron: Putin nuk dëshiron që lufta të përfundojë

18 Gusht 2025, 09:43, Kosova & Bota CNA

Samiti online për Ukrainën/ Macron: Putin nuk dëshiron që

Një ditë më parë u mbajt samiti online i liderëve të "koalicionit të të vullnetshmëve" me pjesëmarrjen e Presidentit të Ukrainës, Volodymyr Zelensky. Takimi u mbajt nën drejtimin e Presidentit francez, Emmanuel Macron, dhe në të morën pjesë edhe liderët e Italisë, Mbretërisë së Bashkuar, Gjermanisë dhe vendeve të tjera aleate.

Macron tha se grupi bisedoi për pak më shumë se dy orë dhe foli për prioritetet që planifikojnë të diskutojnë gjatë takimit të tyre me Presidentin e SHBA-së, Donald Trump.

“Qëllimi ynë është të përpilojmë një strategji të përbashkët në funksion të vizitës së Presidentit Zelensky në Uashington, që zhvillohet të hënën”, tha Macron.

I pyetur nëse beson se Presidenti rus, Vladimir Putin, dëshiron që lufta në Ukrainë të përfundojë, Emmanuel Macron përgjigjet: “Jo”. Ai përsëriti se Ukraina ka nevojë të ketë një ushtri të fortë.

Duke diskutuar takimin e së hënës me Donald Trump, Macron tha se grupi do ta sfidojë presidentin amerikan se sa larg është i gatshëm të shkojë në aspektin e garancive të sigurisë për Ukrainën. "Nëse nuk jemi të fortë sot, do ta paguajmë shtrenjtë nesër", thotë ai.

Macron vazhdoi duke paralajmëruar se shfaqja e dobësisë tani rrezikon “të hapë rrugën për konflikte të ardhshme” - duke vënë në dukje atë që ai e quan mungesë gatishmërie të mëparshme të Rusisë për të respektuar marrëveshjet e paqes.

Ai shtoi se tani është koha për të kaluar në një “fazë të re diplomatike” për të zgjidhur luftën në Ukrainë.

Presidenti francez tha se siguria e Europës është e lidhur ngushtë me konfliktin aktual dhe udhëheqësit e saj duhet të jenë në tryezën e negociatave për të përfaqësuar më së miri qytetarët e tyre.

Presidenti francez tha se ata duan t’i kujtojnë Trump-it “çfarë i bashkon SHBA-ja, Ukrainën dhe BE-në” – duke përmendur dëshirën e tyre të përbashkët për paqe dhe që Rusia të respektojë “ligjin ndërkombëtar dhe sovranitetin territorial”.

Ai thotë se i ashtuquajturi "koalicion i të vullnetshëmve" ka përsëritur se "nuk mund të kemi diskutime territoriale pa përfaqësuesit e zgjedhur të Ukrainës".

"Plani ynë është të paraqesim një front të bashkuar, duke përsëritur se kush është në anën e paqes dhe të drejtës ndërkombëtare", thotë ai./ CNA