E fundit!

12:39 Aktualitet

“Vrasja e efektivit duhet të hetohet”/ Berisha akuza Hitës: Në vend të dorëheqjes kërkon të mbrojë karrigen e tij

Kreu i PD-së Sali Berisha ka kërkuar hetim të thelluar në ...

Raketat e Libanit plagosin 11 persona në Izrael

2 Nëntor 2024, 09:58, Kosova & Bota CNA

Raketat e nisura nga Libani kanë plagosur 11 persona në qendër të Izraelit, të shtunën, kanë thënë shërbimet e emergjencës.

Luftimet mes forcave izraelite dhe grupit libanez Hezbollah, janë përshkallëzuar prej shtatorit, dhe shpresat për një armëpushim të shtyrë përpara nga Shtetet e Bashkuara, veçse janë zbehur.

Hezbollahu, grup militant dhe parti politike që kontrollon pjesën më të madhe në jug të Libanit, është shpallur organizatë terroriste nga Shtetet e Bashkuara, derisa Bashkimi Evropian e ka në listë të zezë vetëm krahun e armatosur, por jo partinë, e cila ka ulëse në Parlamentin e Libanit.

“Kemi dalë jashtë dhe pamë pluhur, fëmijë duke bërtitur, gra duke bërtitur dhe të gjithë jemi nisur te shtëpia e goditur”, ka thënë Qasim Mohab, banorë i Tiras, ku është hedhur raketa.

“Ne arritëm t’i evakuojmë personat që ishin brenda shtëpisë dhe falë Zotit, jemi bekuar sepse asnjëri nuk është vrarë”.

Në kohën e goditjeve nga raketat, Hezbollahu ka thënë se e ka shënjestruar një bazë ushtarake në paralagjet e Tel Avivit.

Shërbimet ambulantore të Izraelit kanë thënë se 11 persona janë goditur nga predhat.

Sirenat ajrore janë dëgjuar në veri të Izraelit teksa janë kryer sulmet prej Libanit, ka thënë ushtria izraelite.

Të premten, autoriteet shëndetësore të Libanit kanë thënë se 52 persona janë vrarë në sulmet izraelite në dhjetëra qyteza të rajonit Baalbek.

Ushtria izraelite ka thënë të shtunën se ka vrarë dy komandantë të Hezbollahut në rajonin e Tiras, të premten. Hezbollahu nuk i ka komentuar këto deklarata.

Hezbollahu, i mbështetur nga Irani, ka nisur të sulmojë Izraelin, si shenjë mbështetjeje për aleatin palestinez Hamasin – po ashtu të shpallur organizatë terroriste nga Shtetet e Bashkuara dhe Bashkimi Evropian.

Më 7 tetor të vitit të kaluar, Hamasi ka kryer sulm në jug të Izraelit, duke vrarë mbi 1.200 njerëz dhe duke marrë peng rreth 240 të tjerë.

Izraeli, më pas, ka nisur luftën në Gazë, me qëllim të shkatërrimit të grupit.

Si pasojë e fushatës izraelite në Gazë janë vrarë më shumë se 43.000 njerëz, shumica gra dhe fëmijë, sipas autoriteteve shëndetësore palestineze.

Prej ofensivës së nisur nga Izraeli në Liban, në fillim të tetorit, janë vrarë të paktën 2.890 njerëz, sipas autoriteteve libaneze./REL