Prokuroria e Hagës kërkoi 45 vjet burg për secilin nga ish-liderët e UÇK-së/ Reagon Albin Kurti

9 Shkurt 2026, 22:07, Kosova & Bota CNA

Prokuroria e Hagës kërkoi 45 vjet burg për secilin nga

Kryeministri i Kosovës, Albin Kurti ka reaguar pasi Prokuroria e Hagës ka kërkuar 180 vjet burg për ish-krerët e UÇK-së. Në reagimin e tij në rrjetet sociale, Kurti shprehet se UÇK-ja ishte bartëse e një lufte të drejtë, ruajtëse dhe mbrojtëse.

Më tej shton se kërkesa e Prokurorisë nuk mbështetet në ndonjë standard ndërkombëtar të dënimit dhe injoron kontekstin e luftës në Kosovë. Kurti thekson se institucionet e Kosovës do të vijojnë të mbrojnë të vërtetën dhe parimet themelore të drejtësisë

Reagimi i plotë:

Thelbi moral dhe historik i luftës sonë çlirimtare konsiston në mbijetesën dhe dinjitetin e popullit.

UÇK-ja ishte bartëse e një lufte të drejtë, ruajtëse dhe mbrojtëse. Ajo u zhvillua në rrethanat e okupimit të egër kur dhuna e apart’heidit po shndërrohej në gjenocid shtetëror.

Çdo përpjekje për t’i shkëputur veprimet individuale nga ky kontekst historik e politik rrezikon të deformojë të vërtetën dhe kuptimin e asaj lufte.

Ne nuk kemi pasur kurrë plan shfarosje të asnjë populli tjetër apo të civilëve. Kërkesa e sotme e Prokurorisë në Hagë për dënim prej 45 vitesh burgim për secilin nga drejtuesit e akuzuar të UÇK-së nuk mbështetet në ndonjë standard të pranuar ndërkombëtar të dënimit. Ajo injoron plotësisht kontekstin e luftës në Kosovë dhe përpiqet ta vendosë këtë çështje në një vakuum juridik, duke shkëputur veprimet nga realiteti i një lufte çlirimtare.

Republika e Kosovës mbetet e palëkundur në bindjen se UÇK-ja bëri luftë të drejtë dhe kryengritje anti-kolonialiste. Institucionet e Kosovës do të vazhdojnë të mbrojnë të vërtetën faktike e historike, vlerën dhe dinjitetin e luftës për liri si dhe parimet themelore të drejtësisë, duke kundërshtuar çdo orvatje për shtrembërimin e tyre.

Kujtojmë se Prokuroria e Hagës ka kërkuar nga 45 vite burg për ish-krerët e UÇK-së, Hashim Thaçi, Kadri Veseli, Jakup Krasniqi dhe Rexhep Selimi. Prokurorja West ka thënë se nuk kërkohet dënim për Shtabin e Përgjithshëm të UÇK-së, por për personat e akuzuar, duke kërkuar 45 vjet burgim. Në Hagë ditën e sotme nisi faza përfundimtare e procesit gjyqësor ndaj Thaçit, Veselit, Krasniqit dhe Selimit. Nga sot deri më 18 shkurt do të zhvillohen deklarimet përmbyllëse. /CNA