web counter
LEXO PA REKLAMA!

SHKARKO APP

App Store
Google Play

OKB: Gati 800 të vrarë pranë qendrave të ndihmës në Gazë

12 Korrik 2025, 10:38, Kosova & Bota CNA

OKB: Gati 800 të vrarë pranë qendrave të ndihmës

Sipas të dhënave të OHCHR-së, gjatë 10 javëve të fundit në Rripin e Gazës janë vrarë 798 veta në përpjekje për të marrë ndihma humanitare.

Zyra e Komisionerit të Lartë të OKB-së për të Drejtat e Njeriut (OHCHR) njofton se që nga fundi i muajit maj në Rripin e Gazës janë vrarë të paktën 798 veta, që po përpiqeshin të merrnin ndihma.

Sipas zëdhënëses së OHCHR-së, Ravina Shamdasani, 615 prej këtyre vdekjeve janë regjistruar në ose pranë qendrave të shpërndarjes së ndihmave humanitare që operohen nga Fondacioni Humanitar i Gazës (GHF), i cili mbështetet nga SHBA dhe Izraeli.

Krime mizore

Ravina Shamdasan tha se OHCHR është sidomos e shqetësuar në lidhje me "krimet mizore që kryhen aty ku njerëzit rrinë në radhë për të marrë ndihma jetike, siç janë ushqimet".

"Gati 800 veta janë vrarë ndërsa përpiqeshin të merrnin ndihma", tha ajo. "Dhe shumica e të plagosurve kanë plagë nga të shtëna me armë zjarri," shtoi ajo.

183 persona të tjerë janë vrarë "me sa duket pranë konvojeve të ndihmave" të OKB-së dhe të organizatave të tjera të ndihmave në territoret palestineze, u tha ajo gazetarëve në Gjenevë.

Cili është roli i GHF-së?

Veprimtaria e GHF-së, e cila ka paralizuar në fakt rrjetin e gjerë të shpërndarjes së ndihmave të OKB-së në Gazë, është shoqëruar nga skena kaotike dhe është dëmtuar prej raportimeve pothuajse të përditshme për forcat izraelite që qëllojnë mbi civilët që përpiqen të marrin ndihmë.

Shifrat e publikuara nga OKB-ja flasin për të paktën 10 veta të tjerë që u vranë të premten pranë një pike shpërndarjeje ndihmash në Rafah, një qytet në Rripin jugor të Gazës.

Rreth 70 veta të tjerë u plagosën gjatë një incidenti, njoftoi Autoriteti Shëndetësor i Gazës i kontrolluar nga Hamasi.





Lajmet e fundit nga