E fundit!

18:59 Editorial

Mulizimi apo Molëzimi i PD-së?!

Në mbledhjen e fundit të Këshillit Kombëtar të PD-së p...

Netanyahu: Raporti i IPC për urinë në Gazë "gënjeshtër"

23 Gusht 2025, 10:34, Kosova & Bota CNA

Netanyahu: Raporti i IPC për urinë në Gazë

Sipas OKB-së, në disa pjesë të Rripit të Gazës njerëzit vuajnë nga uria. Shefi i OKB-së për të drejtat e njeriut tha se uria në Gazë përbën një krim lufte. Kryeministri i Izraelit e quajti raportin "kryekëput gënjeshtër".

Volker Türk, Komisioneri i Lartë i OKB-së për të Drejtat e Njeriut, tha se uria e konstatuar në disa pjesë të Gazës veriore është "rezultat i drejtpërdrejtë i veprimeve të ndërmarra nga qeveria izraelite".

Ai shtoi se "përdorimi i urisë si metodë lufte përbën krim lufte".

Deklarata e Türk-ut për gazetarët erdhi pasi disa organizata ndërkombëtare, që përdorin për vlerësimet e tyre instrumentin Klasifikimi i Integruar i Fazave të Sigurisë Ushqimore (Integrated Food Security Phase Classification - IPC), deklaruan se ka "prova të arsyeshme" se disa pjesë të Rripit të Gazës po vuajnë nga zia e bukës.

Instrumenti IPC

IPC është një nismë e përbashkët e disa organizatave ndërkombëtare që ofron një kornizë të standardizuar për vlerësimin dhe klasifikimin e shkallës së pasigurisë ushqimore dhe kequshqyerjes akute.

Për të deklaruar zyrtarisht gjendjes e vuajtjes nga uria sipas klasifikimit IPC duhet të përmbushen tri kritere: të paktën 20% e familjeve përballen me një mungesë ekstreme ushqimi, të paktën 30% e fëmijëve vuajnë nga kequshqyerja akute dhe që çdo ditë humbin jetën drejtpërdrejt për shkak të urisë dy persona për çdo 10,000 vetë.

Fletcher: Uria mund të parandalohej

Shefi i OKB-së për ndihmat humanitare, Tom Fletcher, tha se uria mund të parandalohej nëse OKB-së nuk do t'i ishte ndaluar që të dërgonte furnizime me ndihma ushqimore. "Nëse do të na ishte lejuar të vazhdonim dërgimin e ndihmave zia e bukës mund të parandalohej. Kurse tani ushqimet mbeten në kufi për shkak të pengesave sistematike nga Izraeli", tha Fletcher.

Guterres: Kjo situatë nuk mund të vazhdojë pa u ndëshkuar

Sekretari i Përgjithshëm i OKB-së, Antonio Guterres, i quajti kushtet në Rripin e Gazës si "katastrofë të shkaktuar nga njeriu", duke shtuar se Izraeli është i detyruar sipas ligjit ndërkombëtar që të sigurojë rrjedhën e ndihmave humanitare. "Nuk mund ta lejojmë që kjo situatë të vazhdojë pa u ndëshkuar", shtoi ai.

Netanyahu: Klasifikimi i IPC-së është gënjeshtër

Izraeli e hodhi poshtë vlerësimin e IPC-së për zinë e bukës në disa pjesë të Rripit të Gazës, duke thënë se raporti bazohet në "gabime metodologjike" dhe "burime jo të besueshme".

Kryeministri izraelit Benjamin Netanyahu e quajti raportin e mbështetur nga OKB-ja "kryekëput gënjeshtër".

Netanyahu tha se raporti i IPC-së, sipas të cilit të paktën 514,000 vetë po përjetojnë aktualisht zi buke në Rripin e Gazës, injoron hapat humanitare të Izraelit gjatë javëve të fundit.

"Izraeli nuk ndjek një politikë urie, Izraeli ndjek një politikë për të parandaluar urinë", tha Netanyahu në një deklaratë./ DW