Ndahet nga jeta akademiku Minir Dushi/ Kurti kujton takimin e fundit me të

28 Janar 2025, 09:11, Kosova & Bota CNA

Kryeministri Albin Kurti ka përcjellë lajmin e hidhur për ndarjen nga jeta të akademikut Minir Dushi në moshën 95-vjeçare.

Kurti ka kujtuar takimin e fundit me të kur e priti në Prishtinë për të kutjuar konferencën e Bujanit.

Përmes kujtimeve për të, Kurti u ka shprehur ngushëllimet familjes Dushi në Prishtinë dhe Gjakovë, kolegëve të tij në AShAK, bashkëpunëtorëve dhe miqve të tij.

Akademik Minir Dushi do të kujtohet për veprat e tij me vlerë shkencore dhe për veprat e dobishme për shoqërinë dhe ekonominë e Kosovës ndër vite.

Ndahet nga jeta akademiku Minir Dushi/ Kurti kujton takimin e fundit me të

“M’u rikthyen kujtimet nga takimi im i fundit me Akademikun Minir Dushin, kur mora vesh që paska vdekur në moshën 95 vjeçare. Në dhjetor të vitit 2023, ai na pati pritur në shtëpinë e tij në Prishtinë, për të kujtuar Konferencën e Bujanit në 80-vjetorin e saj. Megjithëse në moshë të thyer, ai ende ishte në gjendje të mbante bisedë dhe të kujtonte ngjarje të ndodhura dekada më parë.

Minir Dushi kishte lindur më 1929 në Gjakovë dhe kishte ndjekur të gjitha shkallët e studimeve universitare në fushën e xehetarisë, duke doktoruar më 1965. Që nga themelimi i Universitetit të Prishtinës (1970) ai u zgjodh profesor i rregullt dhe zëvendësrektor i parë i tij. Ai ka shërbyer për dy mandate si dekan në Fakultetin e Xehetarisë dhe Metalurgjisë, kurse në vitet 1981-’83, ishte rektor i Universitetit të Prishtinës, periudhë për të cilën ai ka shkruar një monografi.

Që nga themelimi i Akademisë së Shkencave dhe Arteve së Kosovës më 1975, Profesor Dushi ishte anëtar korrespodent i saj, kurse nga viti 1978 anëtar i rregullt. Akademik Minir Dushi është autor i mbi 180 njësive bibliografike, prej të cilave 18 libra shkencorë. Ai ishte veteran i Luftës së Dytë Botërore dhe veteran i arsimit në Kosovë.

Përmes evokimit të këtyre kujtimeve për të, u shpreh ngushëllimet e mia më të sinqerta për vdekjen e Akademik Minir Dushit, familjes Dushi në Prishtinë dhe Gjakovë, kolegëve të tij në AShAK, bashkëpunëtorëve dhe miqve të tij.

Akademik Minir Dushi do të kujtohet për veprat e tij me vlerë shkencore dhe për veprat e dobishme për shoqërinë dhe ekonominë e Kosovës ndër vite”, shkruan Kurti./ CNA