E fundit!

08:12 Aktualitet

Thyerje xhamash dhe hedhje uji/ Çfarë ndodhi në protestën para Komisariatit nr.3

Në protestën e zhvilluar mbrëmjen e djeshme te Komisariati...

Ministria e Jashtme në Prishtinë: Asnjë shtetas kosovar nuk ndodhet në Gazë

21 Nëntor 2023, 12:14, Kosova & Bota CNA

Ministria e Jashtme në Prishtinë: Asnjë shtetas kosovar nuk

Ministria e Punëve të Jashtme dhe Diasporës e Kosovës (MPJD) tha të martën se asnjë shtetas kosovar nuk ka jetuar dhe nuk ndodhet në Rripin e Gazës tani, enklavën palestineze, e cila është duke u përballur me sulme të vazhdueshme izraelite tash e shumë javë.

Izraeli i nisi bombardimet dhe pastaj një ofensivë tokësore në Gazë më 7 tetor, si përgjigje ndaj sulmeve të Hamasit – grupit radikal palestinez të shpallur organizatë terroriste nga Shtetet e Bashkuara – në qytetet e Izraelit jugor, ku u vranë mbi 1.200 njerëz dhe u rrëmbyen rreth 240 të tjerë.

Ministria e Jashtme tha për "Radion Evropa e Lirë" se në bazë të informatave të konfirmuara të ambasadës së Kosovës në Jerusalem “asnjë shtetas i Kosovës nuk ka jetuar dhe nuk ndodhet në këto momente në Gaza”.

Mbi 12.700 njerëz janë vrarë në Gazë gjatë sulmeve izraelite prej 7 tetorit, sipas Ministrisë së Shëndetësisë së Gazës, e cila udhëhiqet nga Hamasi.

Evakuimi i shtetasve të huaj dhe palestinezëve me shtetësi të dyfishtë, përfshitë të plagosurve rëndë nga Gaza përmes pikëkalimit kufitar me Egjiptin, Rafah, nisi më 1 nëntor.

Deri më tani janë evakuuar mijëra njerëz, përfshirë 11 shtetas të Shqipërisë.

Ndërkohë, MPJD njoftoi se deri më tani 10 kosovarë janë evakuuar nga Izraeli, të gjithë në ditët e para të konfliktit.

“Ambasada e Republikës së Kosovës në Izrael u ka ofruar të gjithëve mundësitë dhe lehtësirat e nevojshme për tu larguar nga vendi në ditët e para të konfliktit”, tha MPJD.

Por, ajo shtoi se tani më fluturimet e organizuara janë ndërprerë dhe “eventualisht secili duhet të gjejë mundësitë individualisht për t’u larguar” nga Izraeli./ REL

Ambasada e Republikës së Kosovës në Izrael vazhdon të mbanë kontakte të rregullta me të gjithë shtetasit e mbetur në territor dhe konfirmohet se gjendja e tyre në përgjithësi është e mirë, sipas MPJD.