E fundit!

12:56 Aktualitet

VIDEO/ Rama i kritikon, kryebashkiakët ia plasin të qeshurës

Kryeministri Edi Rama ka kritikuar ditën e sotme gjatë zhv...

Lufta e Ukrainës, kush po fiton? Analistët:Do të jetë shumë e gjatë

25 Qershor 2023, 19:30, Kosova & Bota CNA

Lufta e Ukrainës, kush po fiton? Analistët:Do të jetë

Pesëmbëdhjetë muaj. Pra ka kaluar një kohë e gjatë që kur Rusia sulmoi në shkallë të plotë Ukrainën në shkurtin e vitit të kaluar. Një konflikt i gjatë dhe i përgjakshëm, fundi i të cilit duket ende i largët dhe përfundimi i të cilit është më i pasigurt se kurrë, i lidhur me një seri të gjatë ndryshoresh.

Mendimet mbi atë që do të ndodhë janë jo gjithmonë të njëjta midis analistëve të luftës dhe ekspertëve. Por ka disa ndjesi tek të cilat dominon më shumë arsyeja se sa tek disa të tjera. Për të kuptuar se cilat zhvillime mund të jenë në front, portali i njohur investigativ “Insider” pyeti katër ekspertë (Marina Miron, studiuese në Departamentin e Studimeve të Luftës në Kolegjin Mbretëror në Londër; Dejvid Luis i Institutit të Shërbimeve të Bashkuara Mbretërore; Jarosllava Barbieri nga Universiteti i Birmingemit, eksperte për Rusinë dhe shtetet post-sovjetike; dhe Xhon E.Herbst, ambasador i SHBA-së në Ukrainë në vitet 2003-2006), për të bërë një përmbledhje të aspekteve thelbësore të këtij konflikti.

Territori

E vërteta në terren, në raport me objektivat e deklaruara, i shpërblen për momentin më shumë rusëve. Është e vërtetë, që kishin paralajmëruar se do ta pushtonin brenda pak ditësh Kievin dhe pas 15 muajsh janë ende shumë larg këtij objektivit. Por në pjesën tjetër të frontit janë në përputhje me atë që donin.

Kështu ata po vazhdojnë të mbrojnë Donetsk dhe Luhansk, dy rajonet e shkëputura të Ukrainës Lindore që Rusia i njohu si shtete të pavarura. Më pas rusët përdorën strategjinë e ri-përcaktimit gradualisht të qëllimeve, gjë që në mënyrë të pashmangshme i bën ata të jenë gjithmonë pak më afër synimit se sa ukrainasit.

Këta të fundit kanë deklaruar se duan të çlirojnë të gjitha territoret e pushtuara, përfshirë Krimenë, të cilën Rusia e aneksoi në vitin 2014. Një skenar që sipas të gjithë analistëve duket fare i pamundur. “Unë nuk mendoj se do të jetë ndonjëherë e mundur”- mendon Miron. “Ka shumë pak gjasa që këto synime të arrihen në një periudhë afatshkurtër - thotë Luis - sepse kjo do të impononte gjithashtu një ndryshim të politikës për Rusinë, dhe kjo në thelb do të thotë të paktën një ndryshim regjimi në Moskë, gjë që për momentin duket shumë e pamundur”.

Morali

Ndërkohë në këtë aspekt, analistët pajtohen se peshorja po anon në anën e Ukrainës. Barbieri thotë se “Rusia duket se është në panik dhe këtë e konfirmojnë edhe ndryshimet e mëdha në udhëheqjen e saj ushtarake”. Sipas ekspertes, faza vendimtare ishte rezistenca e Kievit në muajt e parë të sulmeve.

Mbrojtja e kryeqytetit u dha ukrainasve bindjen se mund të fitonin konfliktin, duke i zmbrapsur trupat e Putinit. Si të mos mjaftonte kjo, ndryshimet e vazhdueshme të objektivave të Kremlinit, e kanë ekspozuar Rusinë ndaj një situate komplekse edhe në frontin e brendshëm, ku popullata ka filluar të shprehë dyshime serioze mbi atë që Moska vazhdon ta quajë “operacionin ushtarak special”.

Fitorja ushtarake

Përcaktimi se cila nga palët është më pranë fitores ushtarake është jashtëzakonisht i vështirë. Sidomos pas kundërsulmit ukrainas që ka nisur kohët e fundit. Sipas Luis “disa fitore të lokalizuara të trupave të Zelenskit” nuk do të nënkuptojnë se Kievi ka arritur suksese të rëndësishme strategjike”.

Kjo sepse pavarësisht një mijë problemeve që kanë, forcat ruse duken ende të ngulitura mirë në zonë. Por Herbst e sheh Ukrainën në një situatë të favorshme. “Edhe përballë sukseseve, siç është pushtimi i Bakhmut, Rusisë i është dashur të pësojë humbje shumë të rënda. Prigozhin foli për 20 mijë ushtarë rusë të vrarë. Në rastin më të mirë, kjo është për Putinin një Fitore si e Pirros”- thotë ai.

Negociatat

Në këtë moment ato duken të largëta, dhe kështu mendojnë të gjithë analistët, që parashikojnë se lufta do të vazhdojë edhe në vitet e ardhshme. Sipas Barbierit, nëse kundërofensiva e Ukrainës nuk do të arrijë rezultate të rëndësishme, mund të ketë veprime nga qeveritë perëndimore për ta shtyrë Kievin të ulet në tryezën e bisedimeve “bazuar në pranimin e realitetit se kjo luftë nuk mund të fitohet me mjete ushtarake”.

Gjërat ndryshojnë nëse do të ketë një përparim të vazhdueshëm të ukrainasve. Në këtë skenar, topi do të kalonte në duart e Putinit. Herbst, që është një njohës i thellë i Carit, mendon se lideri rus mund të ulet në tryezën e bisedimeve vetëm kur të ketë kuptuar se nuk ka asnjë mënyrë për të arritur qëllimet e tij. Por, përpara se Putini të arrijë në një vlerësim të tillë, ka ende shumë letra të tjera që duhen luajtur në fushën e betejës./ Pershtatur nga CNA