Ligjvënësit e BE-së rrisin trysninë për të shkurtuar fondet për Hungarinë

15 Shtator 2022, 20:55, Kosova & Bota CNA

Ligjvënësit e BE-së rrisin trysninë për të

Viktor Orban, kryeministër i Hungarisë

Pjesa më e madhe e ligjvënësve të Bashkimit Europian votuan të enjten duke dënuar atë që i është bërë demokracisë në Hungari, nën drejtimin e kryeministrin Viktor Orban, duke rritur trysninë mbi bllokun për të shkurtuar fondet për vendin ish-komunist.

Duke përmendur rreziqet për korrupsion, Komisioni Europian pritet të rekomandojë më vonë këtë javë pezullimin e miliarda eurove të parashikuara për Budapestin, nga buxheti i përbashkët i bllokut prej 1.1 trilionë eurosh për vitin 2021-2027.

Kjo do të shënonte masën e parë të këtij lloji të ndërmarrë nga BE-ja nën rregullin e ri financiar të ashtuquajtur "para për demokracinë", për të cilin u ra dakord dy vjet më parë pikërisht si përgjigje ndaj zotit Orban, si dhe aleatëve të tij në Poloni, e në mbështetje të parimeve liberale demokratike brenda bllokut.

Të enjten, Parlamenti Evropian miratoi me 433 pro dhe 123 kundër, një raport që fliste mbi "ekzistencën e një rreziku të qartë për shkelje serioze nga ana e Hungarisë të vlerave mbi të cilat është themeluar Bashkimi Europian".

"Situata është përkeqësuar aq sa Hungaria është bërë një 'autokraci e zgjedhur' dhe jo një demokraci", thuhej në një deklaratë të parlamentit.

Në përgjigje të kësaj, partia që qeveris vendin, Fidesz, së cilës i përket zoti Orban, tha se parlamenti i BE-së ishte më i interesuar për të goditur Hungarinë sesa për të trajtuar një krizë ekonomike të shkaktuar nga rritja e kostos së energjisë, situata e rënduar nga sulmi i Rusisë ndaj Ukrainës dhe sanksionet perëndimore kundër Moskës.

"Është befasuese që edhe në krizën aktuale, shumica e majtë e Parlamentit Europian është e zënë vetëm me sulmet ndaj Hungarisë", thuhej në deklaratën e Fidesz.

Zoti Orban ka qenë i ngërthyer prej vitesh në debate të ashpra me BE-në, në të cilën Hungaria u anëtarësua në vitin 2004, mbi çështje që lidhen me të drejtat e emigrantëve, homoseksualëve dhe grave, si dhe pavarësinë e gjyqësorit dhe medias.

Komisioni Europian ka bllokuar tashmë rreth 6 miliardë euro të parashikuara për Budapestin nga paketa e veçantë e stimulit ekonomik të bllokut për pandeminë e COVID-19, duke përmendur masat mbrojtëse të pamjaftueshme kundër korrupsionit në prokurimin publik të Hungarisë./ VOA