E fundit!

21:22 Aktualitet

Tubimi i 45-të/ Protestuesit marshojnë në rrugët e Tiranës me thirrje kundër qeverisë

Protestuesit janë larguar nga Kryeministria pas përfundimi...

Jeffrey Epstein tentoi të blejë pallat luksoz në Marok një ditë para arrestimit

27 Shkurt 2026, 07:50, Kosova & Bota CNA

Jeffrey Epstein tentoi të blejë pallat luksoz në Marok një

Financieri amerikan, Jeffrey Epstein, u përpoq të blinte një pallat multimilionë dollarësh në Marok vetëm një ditë para arrestimit të tij në korrik 2019, sipas dokumenteve të publikuara nga Departamenti i Drejtësisë i SHBA-së.

Sipas dosjeve, më 5 korrik 2019 Epstein nënshkroi një transfertë bankare prej 14.95 milionë dollarësh si pjesë e një marrëveshjeje për të blerë për 18 milionë euro kompaninë offshore që zotëronte pronën luksoze “Bin Ennakhil”, e vendosur në lagjen elitare Palmeraie të Marrakeshit. Një ditë më pas ai u arrestua në Nju Jork për akuza të trafikimit seksual.

Tri ditë pas arrestimit, kontabilisti i tij, Richard Kahn, anuloi transfertën bankare dhe blerja nuk u finalizua.

Negociata që zgjatën vite

Dokumentet tregojnë se interesi i Epstein për pronën daton që nga viti 2011. Pallati, i përshkruar si një kryevepër arkitekturore e ndërtuar nga rreth 1,300 artizanë me gdhendje dhe mozaikë të zbukuruar, ishte në pronësi të biznesmenit gjerman Gunter Kiss.

Fillimisht, Epstein e konsideroi çmimin prej 55 milionë eurosh të ekzagjeruar dhe bëri një ofertë shumë më të ulët, e cila u refuzua. Negociatat vazhduan për vite me ndërmjetësimin e partneres së tij Karyna Shuliak dhe agjencisë Kensington Luxury Properties.

Në një fazë të diskutimeve, u propozua që prona të regjistrohej në Marok me një vlerë më të ulët, ndërsa pjesa tjetër e shumës të transferohej përmes aksioneve të kompanisë offshore që zotëronte pronën. Agjencia mohoi çdo shkelje ligjore, duke deklaruar se transaksioni nuk cenonte rregulloret tatimore.

Spekulime për motive të mundshme

Maroku nuk ka traktat ekstradimi me SHBA-në, çka ka nxitur spekulime në mediat lokale se blerja mund të kishte si qëllim krijimin e një strehë të mundshme për Epstein në rast ngritjeje të akuzave të reja.

Megjithatë, një ish-bashkëpunëtor i tij ka deklaruar se transaksioni tregon se Epstein “nuk kishte asnjë ide” për arrestimin e afërt. Sipas tij, nëse do të kërkonte një strehë, ai do të synonte një vend ku mund të jetonte “si një mbret”.

Lidhjet e hershme me Marokun

Lidhjet e Epstein me Marokun datojnë që nga fillimi i viteve 2000. Në vitin 2002 ai mori pjesë në dasmën e mbretit Mohammed VI, i ftuar nga ish-presidenti amerikan Bill Clinton.

Pas dënimit të tij në vitin 2008 për nxitje seksuale me të mitura dhe lirimit në vitin 2010, vizitat e tij në Marok u shtuan. Dosjet tregojnë se ai kërkoi ndihmë për të gjetur një pronë në Marrakesh dhe vizitoi rregullisht zonën e Palmeraie-s, e njohur për komunitetin e pasur ndërkombëtar.

Dokumentet e publikuara nuk përmbajnë prova që Epstein ta ketë konsideruar zyrtarisht Marokun si një strehë për t’iu shmangur autoriteteve amerikane./ CNA