web counter
LEXO PA REKLAMA!

SHKARKO APP

App Store
Google Play

E fundit!

x

Italia synon të rrisë me 50% taksën e sheshtë për të huajt e pasur

20 Tetor 2025, 22:27, Kosova & Bota CNA

Italia synon të rrisë me 50% taksën e sheshtë për

Rritja në 300 mijë euro do të ishte një goditje e fortë për të pasurit që kërkojnë të shmangin taksat e larta në pjesë të tjera të Europës

Italia synon të rrisë me 50% taksën e sheshtë mbi të ardhurat e huaja të individëve të pasur që vendosen në vend, duke e çuar në 300 mijë euro.

Rritja, nëse miratohet nga parlamenti, do të përbëjë një goditje të rëndë për të pasurit që kërkojnë të shpëtojnë nga taksat e larta në vende të tjera të Europës.

Gjatë dekadës së fundit, Italia, dhe veçanërisht kryeqyteti i saj financiar, Milano, është shndërruar në një destinacion tërheqës për super të pasurit e botës, të joshur nga cilësia e jetesës dhe lehtësitë fiskale që u mundësojnë të paguajnë një shumë fikse mbi të gjitha të ardhurat e tyre jashtë vendit.

Por skema ka qenë e debatueshme mes qytetarëve të zakonshëm italianë, sidomos në Milano, të cilët e kanë fajësuar atë për rritjen e çmimeve të pasurive të paluajtshme dhe përkeqësimin e krizës së banesave.

Një zyrtar i Ministrisë së Financave deklaroi të premten se masa është përfshirë në projektbuxhetin e Italisë për vitin 2026, i cili parashikon rreth 18.7 miliardë euro ulje taksash dhe rritje të shpenzimeve sociale, përfshirë një ulje taksash për punëtorët me të ardhura të ulëta dhe të mesme.

Projektbuxheti gjithashtu konfirmon synimin e Romës për të mbledhur mbi 4 miliardë euro nga bankat vitin e ardhshëm, pasi anëtarët e koalicionit trepartiak të kryeministres Giorgia Meloni arritën një kompromis në minutën e fundit për mënyrën e sigurimit të të ardhurave pa vendosur një taksë fitimprurëse (windfall tax).

“Është një ligj buxheti që u përgjigjet nevojave dhe problemeve konkrete të familjeve, bizneseve dhe punëtorëve të këtij vendi,” tha Meloni në një konferencë shtypi në Romë.

Me zgjedhjet e ardhshme të përgjithshme të planifikuara për vitin 2027, Meloni është e etur të lehtësojë presionin financiar mbi familjet italiane, fuqia blerëse e të cilave është gërryer nga presionet e forta inflacioniste në vitet pas pandemisë së Covid-19.

Megjithatë, me pritshmëritë për rritjen e PBB-së nën 1% për tre vitet e ardhshme, Roma po kërkon burime të reja të ardhurash për ta mbajtur deficitin buxhetor nën pragun 3% të BE-së.

Nëse miratohet nga Parlamenti në javët e ardhshme, taksa e re e sheshtë prej 300 mijë eurosh do të zbatohet mbi të ardhurat jashtë vendit të personave që zhvendosen në Itali, sapo të hyjë në fuqi buxheti i ri në janar 2026.

Kjo do të jetë rritja e dytë e kësaj skeme, e cila nisi në vitin 2016 për të luftuar “ikjen e trurit”. Që atëherë, ajo ka tërhequr shumë të pasur që janë vendosur në Milano, veçanërisht pasi Britania e Madhe shtrëngoi regjimin e saj fiskal.

Qeveria e Melonit vitin e kaluar e dyfishoi taksën e sheshtë për të ardhurit e rinj në 200 mijë euro. Ministri i Financave, Giancarlo Giorgetti, e përshkroi atëherë skemën si “të ashtuquajturën taksë e sheshtë për miliarderët” dhe këmbënguli se Italia mbetet ende një destinacion tërheqës për super të pasurit, edhe pas rritjes.

Sipas rregullave aktuale, një banor i ri i huaj, ose një italian që kthehet pas të paktën nëntë vitesh qëndrimi jashtë vendit, mund të paguajë një taksë të sheshtë prej 200 mijë eurosh në vit mbi çdo të ardhur apo pasuri të huaj për një periudhë deri në 15 vjet.

Vende të tjera që kanë qenë me interes të shtuar nga të pasurit përfshijnë Emiratet e Bashkuara Arabe, të cilat nuk vendosin asnjë taksë personale mbi individët.

Monako dhe Zvicra vazhdojnë të jenë destinacione të preferuara për super të pasurit. Ndërkohë që Zvicra është një nga vetëm tre vendet europiane që zbaton një taksë mbi pasurinë neto, të huajt e pasur mund të arrijnë marrëveshje të personalizuara me autoritetet kantonale për shumën e përgjithshme të taksave që paguajnë mbi të ardhurat dhe pasurinë e tyre./ Monitor





Lajmet e fundit nga