Tërmeti në Turqi: Heroi që rezistoi kundër ndërtimeve ilegale

16 Shkurt 2023, 08:17, Kosova & Bota CNA

Tërmeti në Turqi: Heroi që rezistoi kundër ndërtimeve

Pamje ilustruese - Në Turqi janë kryer shpesh ndërtime ilegale, tërmeti shkatërroi shumë prej tyre

Ökke? Elmasoglu është kthyer në hero në ditët pas tërmetit në Turqi, e kjo thjesht sepse ai bëri punën si duhet. Elmasolgu është kryetar bashkie i qytetit Erzin me rreth 42.000 banorë. Erzin ndodhet në jug të Turqisë, mes Osmanyie dhe Iskenderun, në qendër të zonës së tërmetit. Por pikërisht në këtë qytet gati nuk ka dëme. Shpjegimi i kryebashkiakut për këtë në televizionin turk është i thjeshtë: "Nuk kam lejuar ndërtime dhe veprime ndërtimi ilegale. Nganjëherë ka ndodhur që ka pasur zemërim ndaj meje, dhe më kanë pyetur me ironi, ti do të jesh më i ndershmi në këtë vend? Sot kam ndërgjegje të pastër. Nuk i kam lejuar ndërtimet ilegale."

Tërmeti në Turqi - njerëzit jetojnë në tenda

Ndërkohë që në Turqi nuk janë të pakta ndërtimet ilegale. Dihet, se ata që ndërtojnë ilegalisht kryejnë një vepër penale, por para zgjedhjeve shpesh përgjegjësit i kanë shpëtuar ligjit. Por sjellja e tyre ishte dhe është e papërgjegjshme, thotë Eyüb Muhcu nga Shoqata e Përgjithshme e Inxhinierëve dhe Arkitektëve Turq. Ai ndodhet para rrënojave të një shtëpie në Adiyaman.

"Siç kemi mësuar bëhet fjalë te ndërtesa për një godinë katërkatëshe, që do të thotë se plani ishte katër kate për ndërtim, dhe stabiliteti i ndërtimit ishte i planifikuar për kaq kate. Më pas, i inkurajuar nga amnistitë politike në ndërtim, u vendosën edhe tri kate të tjera ndërtimi ilegalisht, dhe në fakt me këtë është bërë vrasje."

Bazament i dobët dhe shufra hekuri të lëmuara

Shtimi i një, dy ose tri kateve pa leje në godina është një praktikë e njohur në qytetet turke. Por kjo nuk e shpjegon vetëm katastrofën. Kësaj i shtohet që në disa zona bazamenti i tokës është shumë i butë dhe jo stabël. Një rol luan edhe mënyra e ndërtimit. Një grua rrëfen në Antakya, se bashku me fqinjët ajo kishte kërkuar në rrënoja për kolona çeliku. Nuk gjetëm asnjë, rrëfen ajo. Përveç kësaj ka ndërtime që janë ngritur me materiale që nuk duheshin përdorur, thekson inxhinieri Muhcu. "Në shumë vende shikon, se si është prishur betoni, këtë e provojnë mostrat që kemi marrë. Po kështu ndodh edhe me shufrat e hekurit që janë përdorur." Sipas Muhcu ka ndërtesa që janë ngritur me shufra hekuri të lëmuara, ndërkohë që sipas rregulloreve të ndërtimit duhet të pëdoret në ditët e sotme hekuri i valëzuar.

Shkatërrim pas tërmetit në Turqi

Sipas kryetarit të Bashkisë së Erzinit, Elmasoglu, ndërtimet ilegale kursejnë aty ku nuk duhet. Edhe në Erzin ka pasur ndërtime të tilla, por jo pa i vënë para drejtësisë përgjegjësit, thekson ai. Firmat e ndërtimit janë përpjekur të bindin autoritetet që të mbyllin një sy, por Elmasoglu qëndroi i palëkundur. "Edhe tek unë kanë ardhur ata, janë ankuar, që nuk mund t'ia dalin të marrin një leje ndërtimi, por unë thosha, 'më vjen keq'. Jo pak vetë kanë qenë të zemëruar me mua." Por edhe në Erzin që nuk është dëmtuar nga tërmeti po kontrollohen tani të gjitha ndërtimet./DW