web counter
LEXO PA REKLAMA!

SHKARKO APP

App Store
Google Play

E fundit!

x

Humbja në zgjedhjet e 28 dhjetorit/ Abdixhiku paralajmëron dorëheqjen si kryetar i LDK-së

14 Janar 2026, 09:02, Kosova & Bota CNA

Humbja në zgjedhjet e 28 dhjetorit/ Abdixhiku paralajmëron

Kryetari i Lidhjes Demokratike të Kosovës, Lumir Abdixhiku, ka njoftuar se i ka ofruar dorëheqjen Kuvendit të partisë.

Në një reagim në rrjetet e tij sociale, Abdixhiku thekson se Kuvendi, si organi më i lartë i partisë, do të vendosë jo vetëm për fatin e kryetarit, por edhe për rrugëtimin e ardhshëm të LDK-së.

Postimi i plotë:

Para shtëpisë sonë, anëtarësisë tonë; me transparencë të plotë.

Ishte një takim joformal, konsultativ me nënkryetarët e LDK-së, por me interesim të jashtëzakonshëm publik, për çka i falënderoj sinqerisht mediat e Kosovës.

Siç kam deklaruar në konferencën për shtyp natën e zgjedhjeve, e kam për obligim moral, njerëzor dhe politik t’ia ofroj dorëheqjen time anëtarësisë së LDK-së, përkatësisht Kuvendit tonë. Nuk e bëj këtë për të ikur nga përgjegjësia, por për t’u përballur me të. Sepse përgjegjësia nuk bartet me justifikime, por me guxim për t’u vënë përpara gjykimit të njerëzve të tu.

Kuvendi, si organi më i lartë i partisë, le të vendosë me dinjitet demokratik jo vetëm për fatin e kryetarit dhe timin personal, por edhe për rrugëtimin e ardhshëm të LDK-së.

Ju falënderoj nga zemra për të gjitha mesazhet e marra, një nga një, që nga nata e zgjedhjeve e deri sot, dhe për kërkesat e shumta për mosdorëheqje. Secili prej tyre më ka prekur. Më ka kujtuar sa shumë njerëz kanë besuar, kanë punuar dhe kanë sakrifikuar për këtë shtëpi politike. Dhe pikërisht për ta, nuk kam të drejtë as të fshihem, as të mbrohem pas askujt tjetër. Kam vetëm detyrimin të dal përpara. Sepse mbi çdo ndjenjë personale qëndron përgjegjësia ndaj anëtarësisë dhe ndaj institucionit që përfaqësojmë. Le të vendosë anëtarësia jonë. Kjo është mënyra më e ndershme dhe më e drejtë.

Në këtë proces, nuk jam as i pagabueshëm, as i përsosur. Kam bërë gjithçka që kam ditur e kam mundur për LDK-në. Disa beteja i fituam, disa i humbëm. Por asnjëherë nuk kam punuar për veten time më shumë sesa për këtë parti.

Në këtë kohë, secili që ka ambicie, vullnet dhe aftësi, le ta kërkojë hapur mbështetjen e anëtarësisë sonë. Demokracia nuk është rehati; është guxim për të hyrë në garë, edhe kur është e vështirë.

Fillimisht do ta mbledhim Kryesinë, në një takim zyrtar. Më pas edhe Kuvendin. Dhe çfarëdo që të vendosë anëtarësia, unë do ta respektoj me qetësi dhe dinjitet, sepse mbi çdo emër, mbi çdo funksion, qëndron LDK-ja dhe besimi i njerëzve të saj.

Vendimi për dorëheqje i Abdixhikut vjen pas rezultatit të zgjedhjeve të parakohshme parlamentare të 28 dhjetorit. Lëvizja Vetëvendosje me kryetar Albin Kurtin fitoi 51.11% të votave apo përkthyer në vota, 486.994 vota që i japin 57 vende në Kuvend. Vetë Kurti ishte personi më i votuar në Kosovë duke marrë 404.023 vota.

Partia e dytë doli Partia Demokratike e Kosovës me 20.19% të votave apo 22 vende në Kuvendin prej 120 deputetësh. Lidhja Demokratike e Kosovës ka fituar 13.23 për qind të votave, që i sigurojnë kësaj partie 15 vende në organin ligjvënës.

Aleanca për Ardhmërinë e Kosovës ka fituar 5.50 për qind të votave dhe kjo parti do të ketë gjashtë deputetë. Lista Serbe, partia kryesore e serbëve në Kosovë, e afërt me Beogradin zyrtar, do të ketë nëntë nga dhjetë vendet e garantuara për komunitetin serb. /CNA





Lajmet e fundit nga