E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

Florida/ Rrezikohet jeta e banorëve nga uragani "Milton"

8 Tetor 2024, 08:34, Kosova & Bota CNA

Uragani "Milton" rrezikon të bëhet stuhi katastofale e kategorisë së pestë për Floridën, duke kërcënuar kështu këtë shtet amerikan, i cili është përballur me një uragan tjetër vdekjeprurës vetëm pak javë më parë.

Milton, që pritet të shtrihet edhe në gadishullin Juktan të Meksikës, është intensifikuar me shpejtësi, duke nxitur evakuimin e banorëve.

Autoritetet kanë lëshuar paralajmërime se banorëve mund t'u rrezikohet jeta në brigjet perëndimore të Floridës.

Komunitetet në atë zonë janë përballur me uraganin "Helene" në fund të muajit të kaluar.

“Herën e kaluar makinat e njerëzve janë mbuluar prej ujit nëpër rrugë, mirëpo këtë herë më e rrezikshme do të jetë era”, ka thënë David Levitsky, një pensionist në ishullin Trezhër.

Në njoftimin e fundit të autoriteteve është thënë se uragani "Milton" mund të përcillet me erëra deri në 280 kilometra në orë.

Autoritetet lokale kanë lëshuar urdhra për evakuim të detyrueshëm për disa zona bregdetare, përfshirë Tampan, zonë me më shumë se tre milionë banorë.

“Nëse stuhia do të jetë me këtë ritëm, do të jetë më e keqja që ka prekur Tampan në 100 vjetët e fundit”, ka thënë Shërbimi Kombëtar i Motit, përmes një postimi në "X", platformë e njohur më parë si "Twitter".

Shkencëtarët besojnë se ndryshimet klimatike janë duke luajtur rol në intensifikim të uraganeve.

Presidenti amerikan, Joe Biden, është njoftuar për uraganin "Milton", dhe ka thënë përmes një deklarate se administrata e tij është duke u përgatitur për “burime jetëshpëtuese”.

Uragani Helene i ka goditur brigjet e Floridës në fund të shtatorit, si stuhi e kategorisë së katërt, dhe është përshkruar si katastrofa natyrore më e rëndë në tokën amerikane prej uraganit "Katrina" të vitit 2005.

Deri më tani raportohet që më shumë se 250 persona kanë vdekur si pasojë e stuhisë, dhe numri pritet të rritet./REL