web counter
LEXO PA REKLAMA!

SHKARKO APP

App Store
Google Play

E fundit!

x

Dështon për herë të tetë konstituimi i Kuvendit të Kosovës

29 Prill 2025, 11:48, Kosova & Bota CNA

Dështon për herë të tetë konstituimi i Kuvendit të

Ka dështuar sot për herë të tetë konstituimi i Kuvendit të Kosovës. Seanca e kësaj të marte ishte menduar si një mundësi për të vijuar procesin e nisur në shtatë seanca radhazi, që nuk çuan në asnjë vendim konkret.

Deputeti i Lëvizjes Vetëvendosje, Glauk Konjufca, ripropozoi kandidaten Albulena Haxhiu për kryetare të Kuvendit të Kosovës. Nga 110 deputetë të pranishëm në sallë, pro Haxhiut për kryeparlamentare votuan 54 deputetë, 44 votuan kundër dhe 3 abstenuan.

Drejtuesi i seancës, Avni Dehari, njoftoi se seanca e sotme ndërpritet, për të vijuar përsëri më datë 1 maj.

"Në bazë të kësaj, detyrohemi ta ndërpresim seancën, shihemi të enjten, më 1 maj, në orën 10:00",-tha kryesuesi i seancës, Avni Dehari.

Partitë opozitare përsëritën qëndrimet e tyre se Lëvizja Vetëvendosje po e mban peng shtetin e Kosovës duke mos e ndërruar kandidaten për kryetare të Kuvendit.

Kryetari i partisë së dytë më të madhe, Partisë Demokratike të Kosovës (PDK), Memli Krasniqi, tha se Lëvizja Vetëvendosje po sillet me mentalitetin e njëjtë për tetë herë me radhë.

"E para, demokracia funksionon me shumicë. E dyta, institucionet janë të popullit. Dhe, e treta, koha e sundimit njëpartiak dhe e monizmit ka përfunduar. Sa më parë që Lëvizja Vetëvendosje t'i kuptojë këto tri çështje, aq më mirë për vendin. Është e tepërt të sillemi këtu çdo 48 orë",-tha Krasniqi.

Nga 61 vota sa nevojiten minimalisht, deri më tani Albulena Haxhiu ka marrë jo më shumë se 57 vota për kryetare të Kuvendit të Kosovës, të cilat 48 janë nga Lëvizja Vetëvendosje dhe 9 nga deputetët që vijnë nga komunitetet. Për herë të parë seanca konstituive u mbajt më 15 prill./CNA





Lajmet e fundit nga