Buzëqeshje dhe habi/ Si reagoi SHBA-ja ndaj Mbretit Charles

30 Prill 2026, 08:49, Kosova & Bota CNA

Shtetet e Bashkuara të Amerikës shpallën pavarësinë nga kurora britanike 250 vjet më parë, por këtë javë amerikanët kanë folur shumë për Britaninë.

Që nga momenti që Mbreti Charles dhe Mbretëresha Kamila shkelën në lëndinën jugore të Shtëpisë së Bardhë, rrjetet amerikane lanë mënjanë “dietën e tyre” standarde të luftës politike dhe lajmeve të fundit për diçka të rrallë: shkëlqimin e çiftit mbretëror.

Në një vend që duket se nuk bie dakord pothuajse për asgjë, familja mbretërore britanike arriti diçka pothuajse të paarritshme, duke marrë pritje të ngrohta nga të dyja anët e një spektri politik ku terreni neutral është i rrallë.

Vizita erdhi në një kohë të tensionuar në marrëdhëniet SHBA-Britani, me Shtëpinë e Bardhë dhe Downing Street në mosmarrëveshje për shkak të luftës në Iran, duke tensionuar një marrëdhënie për të cilën të dyja qeveritë këmbëngulin se mbetet e palëkundur.

Vlerësimet pas paraqitjeve të Mbretit në Shtëpinë e Bardhë, në Kongres dhe në Nju Jork ishin të larta nga të gjitha kahet politike.

Komentet e Mbretit në Kongres dhe në banketin luksoz të Shtëpisë së Bardhë të martën, duke përzier humorin me historinë dhe një thirrje për unitet, u vlerësuan gjithashtu gjerësisht.

Disa i panë ato si një qortim delikat ndaj Presidentit Trump.

Për muaj të tërë, Donald Trump, një anglofil i përkushtuar dhe një tifoz i zjarrtë i familjes mbretërore, u tha vazhdimisht gazetarëve se ishte i emocionuar për vizitën e Mbretit. Ky emocion u shfaq plotësisht gjatë gjithë vizitës së Mbretit në Uashington, në të cilën bota pa një version më të ngrohtë të një presidenti që nuk ngurronte të shprehte ndjenjat e tij.

Çuditërisht, Trump iu përmbajt kryesisht një skenari, duke mos përmendur mosmarrëveshjet politike me Downing Street dhe duke lavdëruar lidhjet e gjata midis SHBA-së dhe Britanisë.

"Para se të shpallnim pavarësinë tonë, amerikanët mbanin brenda nesh dhuratat e rralla të guximit moral. Dhe kjo vinte nga një mbretëri e vogël, por e fuqishme përtej detit", tha Trump.

Në Capitol Hill, ku Mbreti u bë vetëm monarku i dytë britanik që mbajti një fjalim në një seancë të përbashkët të Kongresit, Charles mori duartrokitje nga të pranishmit të cilët u ngritën në këmbë.

Elizabeth Holmes, një eksperte për Familjen Mbretërore dhe autore, i tha BBC-së se shumë anëtarë të publikut amerikan janë gjerësisht të interesuar për familjen, edhe pse ky interes ka ardhur duke u zbehur gjatë viteve.

Mbreti dhe Mbretëresha udhëtuan për në New York City të mërkurën, ku bënë disa ndalesa, përfshirë një në Memorialin e 11 shtatorit.

Buzëqeshje dhe habi/ Si reagoi SHBA-ja ndaj Mbretit Charles

Jacob Knutton, i cili menaxhon një restorant dhe dyqan me temë britanike në New York, tha se bizneset kanë qenë "shumë më të ngarkuara" me vizitën e Mbretit.

Por jo çdo amerikan është po aq i entuziazmuar.

Ndërsa statistikat e fundit janë të vështira për t’u gjetur, një sondazh i YouGov i kryer në vitin 2024 zbuloi se vetëm 42% e amerikanëve kishin një pikëpamje të favorshme për Mbretin Charles.

Në krahasim me të, nëna e tij, Mbretëresha Elizabeth, mori një vlerësim prej 67%. Mbi tre të katërtat e të anketuarve, 76% - kishin një pikëpamje pozitive për ish-gruan e Mbretit, Princeshën Diana, e cila vdiq në vitin 1997.

Sipas Holmes, në sytë e disa amerikanëve, Charles kishte një fjalim "shumë më pak bindës" sesa nëna e tij, e cila u bë Mbretëreshë në një moshë të re.

Ndjenjat e SHBA-së për Mbretin Charles janë më të ndërlikuara edhe nga marrëdhënia e tij komplekse me djalin, Princin Harry, shtoi Holmes.

Të dhënat nga Google Trends sugjerojnë se kërkimet në SHBA për Mbretin gjatë vizitës u rritën me 20 deri në 25 herë mbi normalen dhe me 50 herë gjatë fjalimit të tij në Kongres.

Të tjerë që nuk e kanë ndjekur nga afër vizitën mbretërore, janë ende të entuziazmuar. Holmes beson se vizita tashmë ka përmirësuar perceptimet e SHBA-së për Mbretin.

"Trump është një figurë kaq polarizuese dhe mendoj se njerëzit ishin shumë të etur të shihnin ndërveprimet e tyre. Mendoj se njerëzit janë të kënaqur që shohin zgjuarsinë britanike në shfaqje", shtoi ajo.

Pranë Shtëpisë së Bardhë të martën, disa nga ata që dolën për të parë kalimin e autokolonës së Mbretit thanë se ndiheshin plot shpresë.

Knutton shpreson gjithashtu që vizita të ndihmojë, pjesërisht për hir të biznesit të tij. Dyqani i tij importon pothuajse të gjitha mallrat nga Mbretëria e Bashkuar dhe ndjen ndikimin e tarifave të Trump.