E fundit!

22:41 Aktualitet

Eric Wendt një hap larg emërimi/ Komiteti i Senatit voton pro gjeneralit si ambasador

Komiteti për Marrëdhëniet me Jashtë i Senatit amerikan ka ...

Anijet ruse në Mesdhe: Ja se si Moska po e sfidon NATO-n

24 Shtator 2022, 10:34, Kosova & Bota Federico Giuliani

Luftanije, kryqëzorë dhe nëndetëse, ndoshta edhe ato bërthamore. Trafiku i flotës ruse nuk ndalet në zemër të Detit Mesdhe. Ndërsa vazhdon lufta në Ukrainë, jehona e këtij konflikti është shtrirë në “Mare Nostrum”, ku marina ruse vazhdon që ta shtojë praninë e saj.

Synimi i Moskës është i qartë: të sfidojë NATO-n, dhe ta bëjë bllokun perëndimor të kuptojë se Kremlini nuk ka frikë nga asgjë dhe nga askush. Dhe lëvizjet variojnë nga patrullimet e shpeshta të kryqëzorëve rusë - të cilët po vërehen më shpesh pranë brigjeve italiane - deri te lëvizjet në fshehtësi të nëndetëseve.

“Sot nuk ka më asnjë krizë rajonale që prek vetëm zonën në të cilën ndodh. Konflikti ukrainas po krijon tensione në zona të tjera. Prandaj për momentin ne e konsiderojmë Rusinë si një kërcënim të madh në Mesdhe”- tha Lorenzo Guerini, Ministri italian i Mbrojtjes, duke folur në konferencën e revistës gjeopolitike “Limes” me tematikë “Ditët e detit” në Trieste.

Prania ruse në Mesdhe

Situata në rajon është dinamike dhe në një evolucion të vazhdueshëm. Deri pak ditë më parë, disa mjete luftarake janë parë në “Mare Nostrum”, përfshirë anijen e madhe antinëndetëse “Admiral Tributs”, kryqëzorin e raketave të klasit Varyag, 2 fragata të pajisura me raketa, “Admiral Kasatonov” dhe “Admiral Grigorovich”, një korvetë me raketa të drejtuara me saktësi, “Orekhovo Zuev”, dhe dy nëndetëse të klasit Kilo, “Krasnodar” dhe “Novorossiysk”.

Megjithatë, nuk ka asnjë siguri në lidhje me praninë e nëndetëses sulmuese “Magdan”, si dhe nëndetëses me energji bërthamore “Orel”. Kujtojmë se prania e Moskës në Mesdhe nuk është vetëm pasojë e luftës së muajve të fundit në Ukrainë.

Në fakt Moska e ka përforcuar bazën saj në portin Tartus në Siri. Po ashtu ajo është e pranishme në Algjeri dhe Libi. Sipas asaj që raportohet nga portali “Itamilradar”, në Mesdheun qendror, në jug të ishullit të Kretës, rimorkiatori i Marinës ruse Sergey Balk, u nis nga Tartus dhe mesa duket u nis drejt Algjerisë.

Lëvizjet e Moskës

Në përgjithësi, Deti Mesdhe përfaqëson një zonë shumë strategjike për Rusinë, aq më tepër pas shpërthimit të luftës në Ukrainë. Para së gjithash, sepse ai është e vetmja rrugë hyrëse për në Detin Azov dhe Detin e Zi, përmes Ngushticës së Dardaneleve (mos harroni se Moska kontrollon brezin tokësor nga Mariupoli në Krime).

Prandaj për Putinin, pasja e një pranie në rajonin e Mesdheut është e rëndësishme, pasi po flasim për një zonë qendrore në perspektivën e tregtisë ndërkombëtare detare. Më pas përmendëm NATO-n. Në rast se Aleanca Atlantike nuk has pengesa në Mesdhe nga trupat ruse, në rastin e tensioneve maksimale, Rusia do të ekspozohej shumë ndaj sulmeve të mundshme të menjëhershme nga Perëndimi, përfshirë ato bërthamore.

Pra, Kremlini do të ishte nën zjarr. Për këtë arsye vendosja e një flamuri në “Mare Nostrum”, bëhet një çështje jetike për Vladimir Putinin. Presidenti rus nuk ka gjasa të nisë një luftë në këtë pjesë të Europës. Megjithatë, Rusia mund të krijojë ende frikë, sidomos nëse do të kufizonte qarkullimin e automjeteve në Mesdhe duke imponuar kriza të reja.

Kërcënimi më i madh vjen nga raketat lundruese “Kalibr”, që janë montuar në anijet e skuadronit të pestë. Ato raketa kanë një rreze veprimi nga 15000 deri në 2500 kilometra.

Përkthyer dhe përshtatur nga CNA.al