E fundit!

22:51 Aktualitet

Biznesmeni Artur Shehu thyen heshtjen: Jam pronar i vjetër i tokës në Zvërnec, nuk i njoh fare investitorët

Biznesmeni shqiptar Artur Shehu ka folur në emisionin Opin...

75% e ndërtimeve në Kosovë janë pa leje

19 Korrik 2024, 15:22, Kosova & Bota CNA

Foto ilustruese

Procesi i legalizimit është i domosdoshëm në Kosovë. Rreth 75 për qind të ndërtimeve ekzistuese janë pa leje. Jo të gjitha ndërtimet pa leje janë ndërtime të parregullta, prandaj ekziston edhe procesi i legalizimit.

Ministri i Mjedisit, Planifikimit Hapësinor dhe Infrastrukturës, Liburn Aliu, ka thënë se 75 për e ndërtimeve ekzistuese në Kosovë janë pa leje ndërtimore.

Për këtë ai ka thënë se projekti i rindërtimit të kadastrit është një projekt, i cili rregullon bazat e rregullimit pronësor në vend.

Ministri ka shtuar se duke marr parasysh gjendjen e kadastrit ky proces është jashtëzakonisht kompleks dhe kërkon shumë punë konkrete në terren.

“Rindërtimi i kadastrit është një projekt, i cili rregullon bazat e rregullimit pronësor në vendin tonë, duke marrë parasysh se përgjatë periudhave të ndryshme kohore dhe sidomos një pjesë e madhe e dokumentacionit kadastral është marrë në Serbi dhe digjitalizimi i tij më pastaj me ato që kanë ngelur dhe përpunimi me kohën ka bërë që të ketë shumë situata të vështira në gjendjen e kadastrit.

Mospërputhje në mes gjendjeve grafike e atyre tekstuale, defekte të cilat duhet të riparohen një për një, parcelë për parcelë të gjitha këto. Është një proces jashtëzakonisht kompleks dhe kërkon shumë punë konkrete në terren”.

Aliu ka thënë se në këtë projekt 70 mijë objekte do të maten, e duke marrë parasysh rëndësinë e rregullimit të kadastrit, ministri ka thënë se është shumë e nevojshme ndihma e qytetarëve dhe komunave.

“Për punë të cilat duhet medoemos ta bëjmë dhe nuk mund të ketë kadastër të rregullt pa e rindërtuar atë. Prandaj këto memorandume janë të rëndësishme, sepse suksesi i këtij projekti varet nga përfshirja e qytetarëve, komunave, profesionistëve të gjeodezisë, në mënyrë që të kemi sukses në këtë projekt. Krahas me punën që lidhet me fushën e pronave është edhe një punë tjetër e rëndësishme, matja gjeodezike e të gjitha objekteve. Rreth 70 mijë objekte në këtë projekt do të maten. Matjen e këtyre do t'u shërbejë atyre qytetarëve që aplikojnë për legalizim. Tash ata nuk kanë nevojë që të bëjnë matjet gjeodezike, që i bie do të mund të kursejnë një pjesë të parave kur të aplikojnë për legalizim. Kjo do të ndihmojë shumë sidomos te ndërtesat kolektive”, ka thënë ai.

Tutje, ministri i Infrastrukturës ka thënë se në dekadën e fundit në Kosovë është vënë një rend sa u përket ndërtimeve dhe lejeve ndërtimore.

Ai ka theksuar se procesi i legalizimit është i domosdoshëm, pasi rreth 75 për qind të ndërtimeve ekzistuese janë pa leje.

“Në dekadën e fundit në Kosovë është vënë një rend sa u përket ndërtimeve dhe lejeve ndërtimore, është vënë një rend që ndërtimet të bëhen në përputhje me planet. Më herët nuk ka pasur plane për një kohë të gjatë, kanë filluar që nga viti 2004 të fillojnë planet e ndërtimit. Këtë zgjerim urban që ka ndodhur nuk kanë mundur institucionet ta përcjellin, ka pasur një potencial të madh zhvillimor në vitet e pasluftës".

"Këtë potencial që është shprehur në objektet e ndërtuara nuk kanë mundur institucionet e asaj kohe që ta përcjellin qoftë me plane dhe inspektorat. Procesi i legalizimit është i domosdoshëm, sepse rreth 75 për qind të ndërtimeve ekzistuese janë pa leje, natyrisht jo të gjitha ndërtimet pa leje janë ndërtime të parregullta, prandaj ekziston edhe procesi i legalizimit. Te pjesa e legalizimit është e nivelit të lartë, kurse te pjesa e ndërtimit ka ende shumë punë për t'u bërë”./ Monitor.al