Shkollës i pikon tavani pas rikonstruksionit/ Bashkia Roskovec i jep sërish miliona Lekë kompanisë

2022-12-02 22:44:11, Denoncim CNA

Shkollës i pikon tavani pas rikonstruksionit/ Bashkia Roskovec i jep

Emisioni Stop në Tv Klan ka ndjekur rastin e shkollës 9-vjeçare “5 Dëshmorët” në fshatin Suk 1 të Roskovecit, që do të rikonstruktohet. Tenderi u zhvillua në periudhën Gusht-Shtator 2022 në vlerën e 800 milionë Lekëve të vjetra. Tenderi u fitua nga dy firmat ‘B.O.E ASI -2A CO SHPK’ dhe ‘SHËNDELLI SHPK’.

Në tabelën afër shkollës është vënë njoftimi për rikonstruksionin, por jo data e fillimit dhe përfundimit. Thuhet vetëm se punimet do të zgjasin 6 muaj.

Edhe drejtoresha e shkollës Violeta Cjapi nuk di më shumë, por po përgatit nxënësit për transferim në një tjetër shkollë.

Shkolla tjetër ku do të transferohen fëmijët në fshatin Suk 2 ka më pak se tre vjet që është rikonstruktuar, por ka probleme dhe nevojë për ndërhyrje. Ironia e fatit është se kjo shkollë është rikonstruktuar sërish nga e njëjta firmë “Shëndelli shpk”.

Gazetarja e Stop Domenika Bajraktari shkon në Bashkinë e Roskovecit, por aty përballet me një situatë të pakëndshme me rojen e policisë bashkiake të Roskovecit, që përplas derën dhe nuk pranon që gazetarja të hyjë brenda institucionit.

Megjithatë, pavarësisht këtij problemi gazetarja arriti të takonte zyrtarë të Bashkisë së Roskovecit, të cilët thanë se punimet zgjasin 6 muaj por nuk arritën të shpjegonin përse nuk kanë nisur punimet.

Por Stop mësoi se shkak është bërë mosdhënia e lejes së punimeve për rikonstruksionin e shkollës, leje që jepet pikërisht nga kjo bashki.

Administratori i firmës “Shëndelli shpk” thotë se pasi të dalë leja e ndërtimit nga Bashkia Roskovec atëherë do të nisin punimet.

“Pritet të dalë leja e ndërtimit këto ditë dhe do fillojnë punimet”, thotë administrator i firmës.

Por e njëjta firmë ka rikonstruktuar shkollën e fshatit tjetër dhe vetëm 2 vite nga rikonstruksioni, muret kanë lagështirë dhe në zona të caktuara pikon uji nga jashtë.

Të pyetur për këtë problem, zyrtarë të Bashkisë së Roskovecit shprehen se pikërisht për këtë arsye shkollën e parë nuk e kanë marrë ende në dorëzim nga firma.

“Kam marrë informacion sot, kam njoftuar operatorin, do bëhet kontrolli nesër në mëngjes. Objekti nuk është marrë në dorëzim nga ne vetëm për atë arsye akoma. 3 vite, deri sa të riparohen defektet”.

Kurse administratori i firmës që ka bërë rikonstruksionin mohon problemet në atë shkollë.

“Bashkia nuk e ka marrë në dorëzim. Kanë bërë proces verbalin e përfundimit të punimeve, por jo përfundimtare, pra është 5 % brenda si garanci 2 vjet dhe ka mbaruar garancia, por shkolla nuk pikon. Kjo që thoni ju nuk qëndron, absolutisht”, thotë ai.

Pas shumë përpjekjesh, gazetarja e Stop arriti që të takonte edhe kryetaren e Bashkisë së Roskovecit, Majlinda Bufi, e cila thotë se bashkia është e hapur për median, edhe pse veprimet e disa prej punonjësve të këtij institucioni treguan të kundërtën. /tvklan.al