Turizmi nxit konsumin e produkteve, doganat arkëtojnë rekordin e 1.62 mld euro në 8 muaj

2 Shtator 2025, 13:46, Ekonomi CNA

Turizmi nxit konsumin e produkteve, doganat arkëtojnë rekordin e 1.62

Doganat kanë arkëtuar në buxhetin e shtetit shifrën rekord prej më shumë se 1.62 miliardë eurosh për 8-mujorin duke kaluar me rreth 55 milionë euro të ardhurat doganore për të njëjtën periudhë të vitit 2024.

Të dhënat operative nga Drejtoria e Përgjithshme e Doganave raportojnë se për 8-mujorin 2025 janë realizuar 158 miliardë lekë të ardhura nga doganat dhe se në krahasim me 8-mujorin 2024 janë rreth +5,3 miliardë lekë më shumë.

8-mujori 2025 shënon rekord të doganave shqiptare me një rritje prej 65% më shumë se vitit 2020 dhe përmirësim prej 82% krahasuar me vitin 2013, mbështetur kryesisht në miradministrimin, digjitalizimin e procedurave doganore, analizën e riskut dhe mbikëqyrjen dhe kontrollin doganor efikas, raportuan doganat.

Rritet konsumi i karburanteve, birrës, kafesë e cigareve

Rritja e të ardhurave është ndikuar kryesisht nga akciza, në total +4,3 miliardë lekë që ka ardhur përgjithësisht nga rritja e importit të karburantit me rreth +2,2 miliardë (rritje e sasisë së konsumuar me rreth 50,137 tonë), cigare me +1,5 miliardë (rritje e sasisë së konsumuar me rreth 176 tonë), vaj lubrifikant +67 milionë dhe pije alkoolike vendi me +60 milionë.

Të gjithë artikujt e akcizës kanë një performancë shumë të mirë në të ardhura krahasuar me 8-mujorin 2024, madje, sipas doganave, janë sasitë më të larta të realizuara që prej vitit 2013, si sasi në konsum artikulli cigare është +176 tonë duke dhënë sasinë më të lartë të rritjes ndër vite, karburanti rreth +50,137 tonë, birra +2,456 tonë dhe kafja +211 tonë, duke arritur kështu nivelet më të larta historike.

TVSH, krahasuar me tetëmujorin 2024 ka dhënë rreth +1,3 miliardë lekë më shumë, e ndikuar kryesisht nga: +1,6 miliardë lekë energji elektrike; +602 milionë lekë nga cigaret; +332 milionë konstruksione metalike; +250 milionë kafe; +227 milionë druri dhe artikujt e tjerë.

Taksa doganore me +258 milionë lekë një shumë e ndikuar nga ndryshimi i origjinës së importit të artikullit mallrat e konsumit të përgjithshëm +145 milionë lekë, konstruksione metalike me +116 milionë lekë, dhe frutat +39 milionë dhe ushqimet e përgatitura me +30 milionë lekë etj…/ Monitor