E fundit!

20:21 Aktualitet

Protestuesit nuk harrojnë Veliajn: I erdhi radha e burgut, të mos lirohet

Protestuesit që mbajnë fjalimet e tyre para Kryeministrisë...

Suficiti 560 milionë euro i qeverisë/ Si rrezikon ekonomia shqiptare

18 Qershor 2026, 12:58, Ekonomi CNA

Teksa të ardhurat buxhetore po arkëtohen me ritme të lakmueshme nga viti në vit, nga ana tjetër, shkalla e efektivitetit të përdorimit të taksave sa vjen e rëndohet.

Përveç shkallës së lartë të abuzimit me fondet publike në projekte jocilësore, të palidhura me përfitimet ekonomike dhe akoma më rëndë në projekte si inceneratorët që vazhdojnë të financohen pa vënë asnjë tullë, qeveria viti pas viti akumulon një suficit buxhetor shumë më të lartë se programi.

Të dhënat e fundit zyrtare nga Ministria e Financave tregojnë se 5-mujorin e vitit 2026 ka një rritje të jashtëzakonshme të suficitit buxhetor, duke tejkaluar ndjeshëm si parashikimet e qeverisë, ashtu edhe performancën e së njëjtës periudhë të vitit të kaluar.

Vlera e suficitit arriti në 53,7 miliardë lekë (560 mln euro) për pesëmujorin e vitit 2026. Ky realizim është gati dyfish më i lartë se plani fillestar i qeverisë prej 26,8 miliardë lekësh në këtë periudhë dhe shënon një rritje të fortë prej rreth 37.6% krahasuar me faktin e vitit 2025, ku ky tregues në 39 miliardë lekë.

Edhe pse në pamje të parë një suficit mund të interpretohet si një lajm pozitiv për konsolidimin fiskal dhe stabilitetin makroekonomik, kjo ecuri në rastin e vendit tonë po penalizon rritjen ekonomike.

Në kontekstin e një ekonomie në zhvillim si ajo e vendit tonë, e cila ka nevoja emergjente për infrastrukturë dhe mbështetje sociale, ky suficit kaq i madh mbi planin zbulon problem kronik që lidhet me mosrealizimin e zërave buxhetorë.

Në një kohë kur qeveria po mbledh taksat me ritme të larta po dështon t’i hedhë këto para mbrapsht në treg përmes investimeve publike, ose pensioneve me të larta, ajo po ngrin likuiditetin në një kohë që vendi ka nevoja të mëdha të paplotësuara sidomos në shëndetësi.

Ky akumulim i parave në llogaritë e qeverisë pranë Bankës së Shqipërisë po ndihmon në forcimin e mëtejshëm të monedhës vendase në tregun valutor. Duke reduktuar sasinë e lekëve në qarkullim, po krijohet një presion shtesë për forcimin e mëtejshëm të monedhës kombëtare, teksa nga ana tjetër eurot që vijnë nga jashtë janë në rritje edhe nga sezoni turistik.

Ky suficit që po vjen si një kursim i detyruar mbart me vete rrezikun çeljes së të gjitha fondeve në muajin dhjetor. Përvoja ka treguar se përqendrimi i miliarda lekëve në një kohë të shkurtër sjell cilësi të dobët të punëve publike për shkak të nxitimit në tenderë e kontrata./Monitor