Rritja e çmimeve në Shqipëri shtyn drejtuesit drejt Maqedonisë së Veriut për karburant më të lirë

25 Mars 2026, 11:40, Ekonomi CNA

Rritja e çmimeve në Shqipëri shtyn drejtuesit drejt

Rritja e çmimit të karburanteve në Shqipëri ka shtuar lëvizjen e drejtuesve të mjeteve drejt Maqedonisë së Veriut për t’u furnizuar me naftë më të lirë. Përmes pikës kufitare të Qafë-Thanës, çdo ditë kalojnë dhjetëra automjete, kryesisht nga zonat e Pogradecit, Përrenjasit dhe më gjerë.

Drejtuesit e mjeteve thonë se diferenca në çmim mbetet e ndjeshme. Një drejtues nga Përrenjasi shprehet se nafta në Maqedoni arrin rreth 160 lekë të rinj dhe furnizohet një herë në muaj, pasi për të “ia vlen” të bëjë këtë lëvizje. Ndërsa një tjetër nga Pogradeci thekson se çmimi atje ka qenë edhe më i ulët, rreth 140 lekë, duke e bërë shpesh zgjedhjen për t’u furnizuar përtej kufirit.

"Çmimi i naftës është rreth 160 lekë të rinj; furnizohemi një herë në muaj. Çmimet, në krahasim me Shqipërinë, janë më të ulëta. Unë vij nga Përrenjasi; për mua ia vlen të furnizohem në Maqedoni. Për të tjerët nuk e di."

"Në Maqedoni nafta ishte 140 lekë, ndërsa në Shqipëri është më e shtrenjtë. Kur më bie rasti, shkoj në Maqedoni. Unë jam nga Pogradeci."

Nga ana tjetër, edhe drejtuesit në Maqedoninë e Veriut konfirmojnë këtë fenomen. Një qytetar nga Struga tregon se çmimi i naftës ka pësuar rritje së fundmi, por sërish mbetet më i ulët se në Shqipëri, çka ka sjellë një fluks të vazhdueshëm automjetesh me targa shqiptare në pikat e karburantit. Ai shton se pret që edhe në Shqipëri të ketë ndërhyrje për uljen e çmimeve.

"Më parë në Maqedoni ka qenë rreth 70 dinarë, ndërsa tani është rritur me 20 dinarë. Kemi parë shumë shpesh makina me targa shqiptare që furnizohen me naftë në Maqedoni. Duhet ta ulin edhe te ju, shpresoj që qeveria të marrë masa."

Ndërkohë, një drejtues nga Shkupi e konsideron naftën në vendin e tij si më të lirë dhe cilësore, duke theksuar se lëvizjet mes dy vendeve janë të shpeshta, jo vetëm për furnizim, por edhe për qëllime turistike.

"Po, nafta është shumë e lirë dhe shumë e mirë në Maqedoni. Ne sot po vijmë drejt Pogradecit, për në liqenin e Ohrit, dhe do të qëndrojmë aty rreth 3 orë."

Ky fenomen vijon të mbetet i dukshëm në Qafë-Thanë, ku diferencat e çmimeve po ndikojnë drejtpërdrejt në zgjedhjet e qytetarëve për furnizimin me karburant./ CNA