web counter
LEXO PA REKLAMA!

SHKARKO APP

App Store
Google Play

Autoriteti i Mbikëqyrjes Financiare: 2.7 miliardë lekë dëme janë paguar në periudhën Janar-Maj

28 Qershor 2023, 16:57, Ekonomi CNA

Autoriteti i Mbikëqyrjes Financiare: 2.7 miliardë lekë dëme

Autoriteti i Mbikëqyrjes Financiare në raportin e fundit shprehet se dëmet e paguara për sigurimin e makinave, pronave dhe shëndetit arritën në 2.7 miliardë lekë në 5 mujorin e parë, me ulje në krahasim me vitin e kaluar.

Ndërkohë, tregu i sigurimeve është zgjeruar me 15% këtë periudhë.

Gjatë muajit janar-maj 2023, dëmet e paguara bruto në tregun e sigurimeve, arritën në rreth 2,7 miliardë lekë, ose 0.3 % më pak se 5-mujorin e parë të vitit 2022.

Kjo ka ardhur kryesisht për shkak të efektit të sigurimit të pronës, si pasojë e përfundimit të pagesave të dëmeve të ngjarjeve të tërmetit të vitit 2019. Pjesa më e madhe e dëmeve të paguara në këtë periudhë, i përkasin tregut të makinave, në vlerën 1.9 miliardë lekë.

Në raportin që shfaq Autoriteti i Mbikëqyrjes Financiare, shihet se vlera e aseteve nga siguracionet arriti në rreth 8.9 miliardë lekë. Sipas dokumentit, gjatë periudhës janar-maj, numri i kontratave të lidhura arriti në 505 mijë me rritje 13%, krahasuar me të njëjtën periudhë të një viti më parë, kur u lidhën 445 mijë të tilla.

AMF vlerëson se tregu mbetet i orientuar te sigurimet e makinave dhe pronave, të cilat sollën 92% të vëllimit të përgjithshëm të primeve, kundrejt 8% që kapin policat për sigurimin jetës.

Sigurimi vullnetar zë 46.5% dhe primet e shkruara bruto të sigurimit të detyrueshëm zënë 53.5% të totalit të tregut./ CNA.al





Lajmet e fundit nga