web counter
LEXO PA REKLAMA!

SHKARKO APP

App Store
Google Play

E fundit!

x

I burgosuri ofrohet për t’i dhuruar veshkën 24-vjeçares së sëmurë/ Institucioni nuk i bën analizën e gjakut

1 Nëntor 2022, 22:03, Denoncim CNA
I burgosuri ofrohet për t’i dhuruar veshkën 24-vjeçares
Marinela Zani

24-vjecarja nga Sukthi i Durrësit, Marinela Zani, disa muaj më parë konstatoi, se veshkat e saj ishin totalisht jashtë funksionit. Njëra nga veshkat funksionon vetëm 4%. Babai i Marinelës, Bashkimi, tregon vështirësinë e jetës tani që vajza duhet të bëjë dy herë në javë dializë.

Në këto kushte, familja Zani bëri thirrje në ekranet televizive për ndihmë për transplantin e një veshke. Këtë mesazh e ndoqi edhe një i paraburgosur në Kukës, Mentor Palavija.

Ky i fundit doli vullnetar që të dhuronte një veshkë nëse grupi i gjakut dhe analizat do t’ia mundësonin. Por Mentori kërkoi të bënte analizën në paraburgim dhe mori si përgjigje nga mjekët e burgut, se kjo procedurë nuk lejohet të kryhet.

Emisioni "Stop" në "Tv Klan" e ka ndjekur këtë rast. Kunata e Marinelës, Suzana Zani, tregon se familjarët u nisën menjëherë në Kukës, ku takuan familjen e Mentor Palavisë dhe shkuan në paraburgimin e qytetit, për të kërkuar bërjen e analizës.

“Ne kemi kërkuar ndihmë për Marinelën. Nga ai kontakt nga intervista më morën në telefon ata të Kukësit mua, dhe më thanë që kemi dëshirë që t’i dhurojmë njërën veshkë kunatës tënde. Lajm i mirë. U gëzova shumë dhe për mua, dhe Marinela, dhe babai i Marinelës. Ne shkuam me babain e Marinelës në Kukës, takuam që donte të dhuronte veshkën, ishte në paraburgimin e Kukësit. Atë moment nuk na lanë. Ndodhi që mjekët e burgut të Kukësit tha nuk është e lejueshme që Mentori të bënte një analizë grup gjaku. Ashtu na thanë mjekët. Na thanë nuk është e lejueshme që një i burgosur të bëjë analizë gjaku dhe të jetë gati për transplant”, thotë ajo.

“Kërkoj ndihmë për veshkën. Unë kam grupin e gjakut B+”, shprehet Marinela e cila bën thirrje për ndihmë.

Ndërsa i paraburgosuri tregon se ai ka vendosur që të dhurojë një veshkë, por nuk e lejojnë për të bërë analizat.

“Më erdhi shumë keq. Ishte mosha shumë e re, 24 vjeçe, e tha televizori edhe mua me erdhi shumë keq, edhe familja shumë shumë e varfër edhe e vendosa, në qoftë se është punë që realizohet, do t’ia dhuroj. Erdhën ata për të më kontaktu mua, për të qënë të bindshëm, që unë do t’ia dhuroj, jo se kam ndonjë interes tjetër.

Po grupin e gjakut e kam bërë kërkesë. Më kanë thënë, që nuk mundet me të nxjerr kush, me të bo analizat e gjakut. Grupin e gjakut me e dit, a i përshtatet apo jo, nuk mundesh me bo analiza. Unë, kur e pashë në televizor, situata ishte urgjente, se njëra i kishte mbaru krejt, tjetra ishte gati përfundimit. Unë këtë e kam me dëshirë shumë të lartë…për këtë thashë me e dit atë analizë. Tmerr jam tani, pse mos realizohet kjo analizë”, thotë i paraburgosuri Mentor Palavija, i cili dëshiron të dhurojë veshkën.

Gazetari i “Stop” shkoi në Kukës për të zgjidhur situatën e analizës së dhuruesit vullnetar në paraburgim.

“Ne jemi në dijeni për kërkesën që ka bërë i paraburgosuri Mentor Palavija, dhe ky kishte bërë dy kërkesa. E para ishte për grupin e gjakut për të bërë analiza, por nuk është diçka emergjente. Dhe kishte kërkesën tjetër për dhëmbët. Kërkesa tjetër që është për grupin e gjakut do bëhet nesër sepse këtu jemi në paraburgim dhe gjithçka është e planifikuar, nuk është se bëhet sot për sot ose sot për nesër”, thotë një punonjëse e paraburgimit të Kukësit.

Të nesërmen u njoftua se Mentori mund të bënte analizën, për të kuptuar nëse mund të dhuronte veshkën për 24-vjeçaren./ tvklan.al





Lajmet e fundit nga